Халықаралық отбасы күнін мерекелеуді ұйымдастыру туралы

Жыл сайын 15 мамырда БҰҰ Бас Ассамблеясы 1993 жылы бекіткен Халықаралық отбасы күні атап өтіледі. Оны өткізу отбасыларға қатысты мәселелерде хабардар болу деңгейін арттыруға және отбасылардың жағдайына әсер ететін әлеуметтік-экономикалық және демографиялық процестер туралы білімді тереңдетуге мүмкіндік береді.

Бұл күнді ұлттық деңгейде өткізу отбасына бағытталған жобаларды ұсынуға, отбасы мәселелері бойынша пікірталастар, конференциялар және басқа да әлеуметтік маңызды іс-шаралар өткізуге ықпал етеді.

Мемлекет елдің тұрақтылығы мен әл-ауқатының кепілі ретінде отбасы институтын қолдауға ерекше көңіл бөледі.

Қазақстан Республикасының Президенті Қ.К. Тоқаев атап өткендей «Мықты және бақытты отбасы – еліміздің әл-ауқаты мен өркендеуінің негізі. Мемлекет отбасы институтын қолдап, кешенді отбасылық саясат жүргізетін болады».

Жалпы бүгінде елімізде отбасы институтын нығайту, баланы қорғау және тұрмыстық зорлық-зомбылықтың профилактикасы саласындағы мемлекеттік саясатты іске асыру бойынша нормативтік-құқықтық және институционалдық база құрылды. Негізгі қағидаттар мен тәсілдер Қазақстан Республикасындағы 2030 жылға дейінгі отбасылық және гендерлік саясат тұжырымдамасында көрсетілген (ҚР Президентінің 2022 жылғы 1 сәуірдегі №853 Жарлығымен өзектендірілген).

Балалы отбасыларды мемлекеттік әлеуметтік қолдау әлеуметтік жәрдемақылар, төлемдер және көрсетілетін қызметтер арқылы жүзеге асырылады. Әлеуметтік төлемдерді ұсыну жүйесі бала туғанда берілетін және бір жасқа дейінгі бала күтімі бойынша, мүгедек баланы тәрбиелеуге берілетін жәрдемақыларды, көп балалы аналар мен отбасылар үшін мемлекеттік жәрдемақыны қамтиды. Жыл сайын тегін ЭКО-ға 7000 квота бөлінеді және басқа да шаралар көзделген.

Барлық өңірлерде «бір терезе» қағидаты бойынша аз қамтылған және көп балалы отбасыларға консультациялық қызметтер көрсететін «Жанұя», «Бақытты отбасы» және «Шаңырақ» 68 Отбасыларды қолдау орталығы жұмыс істейді.

2014 жылдан бастап жыл сайын адамгершілік құндылықтарды жаңғыртуға және отбасы мен некенің оң бейнесін насихаттауға, отбасы мәртебесін арттыруға бағытталған «Мерейлі отбасы» ұлттық конкурсы өткізіледі. Осы жылдар ішінде байқауға Қазақстанның барлық өңірлерінен 20 мыңнан астам отбасы қатысты.

Халықаралық Отбасы күні қарсаңында «Мерейлі отбасы» ұлттық конкурсы басталады.

Халықаралық отбасы күні қарсаңында өткізілетін іс-шаралар отбасы институтын нығайтуға, қазақстандық отбасының оң имиджін насихаттауға, жауапты ерлі-зайыптылықтың маңыздылығын тануға, ата-аналардың бала тәрбиесіндегі жауапкершілігін арттыруға, мемлекеттік отбасылық саясат саласында жүргізіліп жатқан жұмыстар туралы халықты кеңінен ақпараттандыруға, ерлер мен әйелдердің ұрпақты болу денсаулығын қорғауға, тұрмыстық зорлық-зомбылықтың алдын алуға бағытталуы тиіс.

Жоғарыда баяндалғанның негізінде мүдделі мемлекеттік органдарға:

- отбасылық саясат саласындағы өзекті мәселелерді талқылау бойынша халықаралық ұйымдардың қатысуымен кездесулер өткізу;

- бала тәрбиесі және олардың құқықтары мен мүдделерін қорғау бойынша дөңгелек үстел өткізу;

- мемлекеттік органдардың бірінші басшыларының мемлекеттік отбасылық саясат саласында (халықты әлеуметтік қорғау, балалардың құқықтарын қорғау, ерлер мен әйелдердің ұрпақты болу денсаулығын сақтау, тұрмыстық зорлық-зомбылық профилактикасы және т. б.) жүргізіліп жатқан жұмыстары туралы сұхбаттары, мақалаларын жариялау ұсынылады.

Астана, Алматы, Шымкент қалаларының және облыстардың әкімдіктеріне:

- «Мерейлі отбасы» ұлттық конкурсының басталуы шеңберінде «Отбасы ағашы» республикалық акциясын өткізу;
- «Мерейлі отбасы» ұлттық конкурсының әр жылдардағы финалистерінің қатысуымен еңбек ұжымдарында, білім беру ұйымдарында отбасылық құндылықтарды, қазақстандық отбасының оң имиджін насихаттау бойынша бірқатар кездесулер өткізу;
- «Мерейлі отбасы» ұлттық конкурсын жариялау бойынша ақпараттық имидждік жұмыс жүргізу, отбасы институтын нығайту мәселелері бойынша ақпараттық материалдарды БАҚ-та және әлеуметтік желілерде жариялау;

- еліміздің барлық мектептерінде сынып сағаттарын өткізу (оқушыларға отбасының адам өміріндегі маңыздылығын түсіндіру, ата-аналарға, үлкендерге құрмет көрсету мақсатында);

- психологтарды тарта отырып, оқушылардың ата-аналарымен кездесулер өткізу (тәрбие мәселелерінде ата-аналардың педагогикалық сауаттылығын арттыру мақсатында);

- қиын өмірлік жағдайдағы отбасылар үшін қайырымдылық акцияларын ұйымдастыру және дағдарыс орталықтарына, аналар үйлеріне, балалар үйлеріне, мүгедектер мен қарттар үйлеріне көмек көрсету;

- балалар үшін әлеуметтік маңызды іс-шаралар өткізу, білім беру ұйымдарында конкурстар ұйымдастыру, медициналық мекемелерде отбасын жоспарлау мәселелері бойынша «Ашық есік күнін» өткізу және т.б.