Мектебімізде 26 қыркүйек пен 1 қазан аралығында Халықаралық қарттар күніне арналған қамқорлық айы басталды. Қайырымдылық акциясының мақсаты қарттар мен мүгедек адамдарға қамқорлық көрсету, олардың тағдырына қоғамның назарын аударту болып табылады. Сонымен қоса өскелең ұрпақты жалғыз қалған қарияларды, Ұлы Отан соғысына қатысқан ардагерлер мен тылда қызмет көрсеткен қарияларды сыйлап, құрметтеуге шақыру.
«Ақниет» қайырымдылық акциясы аясында мектебіміздің мұғалімдері мен оқушылары мектеп аумағындағы үйлерді аралап, ардагерлерді мерекемен құттықтап, құрмет көрсетті. Акция барысында бірде-бір оқушы, мұғалім тысқары қалған жоқ. Әркім бұл игі істің жауапкершілігін сезініп, қайырымдылық акциясын орындауға барлығы бір адамдай жұмыла кірісті.
Оқушылар қарт адамдарға мынадай жыр шумақтарын арнап:
«Қарттарым асыл – қазынам паналарым,
Құрметтейміз сіздерді даналарым.
Көңілдің ағысынан құласаң да,
Өмірдің биігінен құламағын.»
деп, бір мезгіл қарттардың көңілін көтерді. Олар да өз кезектерінде өткен өмірлерін әңгімелеп, бір уақыт сергіп қалды. Ал қайтар кез таяғанда оқушылар мен ұстаздар қарттарға арнайы дайындаған сыйлықтарын тарту етті. Қарт адамдардың көздеріне жас келіп, бір жағынан қуаныш сезімі байқалды. Олар жақсы көңіл күй мен жасалған қамқорлыққа шексіз алғыстарын білдірді.
Бүгін біз жасы үлкен адамдар туралы жылулықпен айтамыз, себебі олардың өмірлік тәжірибелері мен шыққан белестері орасан. Біздің сенуімізше, мұндай шаралар жылдан жылға дәстүрге айналмақ.
Contacts
