24 наурыз күні " Қазақ тілі мен әдебиеті: оқыту мәселелері және жаңа көзқарас" тақырыбында қазақ тілі мен әдебиеті пәні мұғалімдерінің облыстық форумы өтті. Форум  қаламыздағы "Ә.Ермеков" атындағы мектеп-лицейінде ұйымдастырылып,  офлайн форматта өткізілді. Кейінгі уақытта еліміздегі пандемияға байланысты көптеген жұмыс түрлері қашықтыққа ауыстырылғаны белгілі. Сондықтан офлайн форматта ұйымдастырылған бұл форумды жақсылықтың нышаны деп білу керек. Форумға барған бойда әріптестерді көріп, бетпе - бет кездесу әрқайсымызға ерекше көңіл-күй сыйлады. Осы бір қуанышты сезімді мен өз бойымнан және әр мұғалімнің жүзінен көрдім. Танертең төрт секциядан басталған жұмыс, түстен кейін пленарлық отырыспен жалғасты.  Секциялық жұмыстар аяқталған соң, мектептің 1-қабатында үлкен көрмені араладық. Мұғалім мен оқушы жұмысының нәтижесі осы көрмеде орналастырылған. Көрме терең мазмұнға әрі жаңаша көзқараспен құрылған. Пленарлық отырыста пәнге қатысты көптеген маңызды ақпараттар ортаға салынды. Ең алдымен,  "Оқу бағдарламасын" құруда ескерілмеген дүниелерді, атап айтар болсақ,  тақырыптардың жүйесін сақтау, оқушының жас ерекшелігін  ескеру,  ұсынылған кейбір шығармаларды қайта қарап, іріктеу сияқты кесек ойларды "Тіл мамандары" ортаға салды.   

Орыс сыныптары үшін бір пән ретінде оқытылып жүрген "Қазақ тілі мен әдебиеті" пәнінің мақсат-міндеттері екі бөлек екендігі де назардан тыс  қалған жоқ. Жоғарыда қозғалған мәселелер алдағы уақытта өз шешімін табады деген ойдамын. Себебі бұл мәселелерді "сеңге" теңейтін болсақ, әз-Наурызда сол "сеңнің" қозғалып, бастысы " Тіл жанашырларының" назарына іліккендігінде. 

Сондай-ақ, жаңа тақырыпты түсіндіруде белсенді әдіс - тәсілдерді тиімді қолдану арқылы оқушыны "Оқу сауаттылығына" алып келу жолдары "Өрлеу" біліктілікті арттыру орталығының оқытушысы Ғ. Ғабдоллаевнаның баяндамасында жан - жақты талданса, "Жеке тұлғаны қалыптастыруда "Қазақ әдебиеті"пәнінің маңызы"тақырыбы Жандос ағайдың баяндамасына арқау болды. Әдебиет пәніне тереңнен бойлап, айтылған әр сөзін нақты дәлелдермен шегелеп бар  жан дүниесімен түсіндірген Жандос ағайдың баяндамасы әр мұғалімге ерекше әсер етті. Құтты студенттік кезге қайта оралып, Ағайдан дәріс алып отырғандай күй кештік. Пленарлық отырыста теориялық негіздемелердің барлығы практикамен де  ұштастырылып,  мұғалімдер тәжірибесімен бөліскенін де айта кету керек. Әр баяндамашының тақырыптарының өзектілігі соншалықты уақыттың, арнайы регламенттің бар екенін ұмытып кеттік десем артық болмас. Баяндамашылардан кейін "Еркін микрафон" айдарына өтіп, әр мұғалім тілді оқытуда  көкейінде жүрген қиындықтар мен кедергілерді ұсыныс ретінде жеткізуге мүмкіндік алды.  Шыдамдылық пен асқан жауапкершілікті талап ететін бұл кәсіпті таңдап, қайнаған тірліктің ішінен табылу - мен үшін зор бақыт! Ертеңгүні елін сүйетін, сауатты, халқына адал қызмет ететін тұлға тәрбиелеуде "Қазақ тілі  мен әдебиеті" пәні мұғалімдеріне қойылатын  жауапкершілік қашан да зор болмақ. Әрі бола береді де. Келер күннен жақсы хабар күтетін мұсылман қауымы үшін бұл форумды үлкен істің бастамасы деп түсінген абзал. Шараны өткізуге  мұрындық болған барлық ұйымдастырушыларға алғыс білдіремін. Әр мұғалім  үшін есте қаларлық, ерекше қымбат күн болды. Шара соңында естелік суретке түстік. Әрине,  форумды айна қатесіз сол қалпында тілмен жеткізу мүмкін емес. Мақсатым: сол күннен  алған әсермен  өздеріңізбен бөлісу болатын. Пост авторы: Абишева Л.Ж.