25 ақпанда мұзбалақ ақын Мұқағали Мақатаевтың 91 жылдығына арналған 65 ЖББМ кітапханашысы Сабитовна Майра Фатхуллаеваның және аға тәлімгер Жексенбай Нұрқұйса Жайдарбекұлының ұйымдастыруымен "Жарқ етіп сөнген-бір сәуле! " атты әдеби сазды кеші өтті. Кештің мақсаты - ақиық ақын, артына айрықша өшпейтін із қалдырған Мұқағали Мақатаевтың өмірі мен шығармашылығына шолу жасау, поэзиясының халыққа кең таралуының мәні және оның өміршеңдігінің сыры неде екенін таныту, сезіндіру, шығармашылығының музыкасымен үндесу ерекшелігін, ақынның сөзіне жазылған әндерін көпшілік назарына ұсыну. Кеш барысында мектебіміздің ұстаздары және оқушылары өз шығармашылығымен көрермендердің ерекше ықыласына бөленіп, ақынның әсем әндері мен сыршыл поэзиясын тарту етті. Талантымен елін тамсандырып жүрген әншілеріміз "Есіңе мені алғайсың", "Қайран жеңгем", "Қариялар азайып бара жатыр" т.б. әндерін тамылжыта орындаса, "Ей, өмір", "Поэзия, менімен егіз бе едің?!", "Арыз жазып кетейін", "Ғашықпын" т.б. өлеңдерін мәнерлеп оқыды.

Мұқағали-мәңгілік өмір! Ақын мұрасы,маржан поэзиясы-болашақ ұрпақтың еншісі, қастерлеп қадірлейтін мұрасы, ақын көкірегінен буырқана ағылған жыр жанартаулары өлеңқұмар халыққа таусылмайтын сый, мол қазына болып қала бермек. Кеш соңын ұстаздар мен оқушылар "Күрең күз " әнімен қорытындылады.