02.02.2020 жылы ЖББ №65 орта мектебі 50 жылдық мерейтойын атап өтті. Қуанышты шараға қалалық білім бөлімінен, мектеп басшылары, «Қазақтелеком» ұйымынан, ардагер ұстаздар мен мектебімізде жұмыс атқарған бір топ ұстаздар қауымы және мектеп түлектері қатысты.

  Игі шара мектебіміздің түлегі, бокс королі Геннадий Геннадьевич Головкинге арналған фотоколлажды ашу рәсімінен басталды. Салтанатты рәсім мектеп директоры Кунедилов Нұрбол Даригуловичке және Геннадийдың алғашқы ұстазы Федорченко Тамара Григорьевна мен сынып жетекшісі Цой Анна Борисовнаға бұйырды. Мектеп оқушыларынан құрылған домбырашылар ансамблінің керемет күйімен ұласты.

  Қонақтар мерейтойға орай ұйымдастырылған оқушыларымыздың қолымен жасалған қолөнер бұйымдарын, түлектер галлереясын, «Мектебім-алтын ұя бесігім» атты бұрышын тамашалап, өздері оқыған сынып кабинеттерін аралап, ұстаздарын жолықтырып, керемет әсерге бөленді. Шара мектеп акт залында өткізілген концерттік бағдарламамен ұласты. Концерт мектеп директоры Кунедилов Нурбол Даригуловичтің құттықтау сөзінен басталып, келген қонақтардың игі тілектерімен жалғасты. Сондай-ақ, «Рухани жаңғыру» бағдарламасы аясында жас ұрпақты ұлттық құндылықтарға тәрбилеу, бабалар сөзін дәріптеу мақсатында жауапты ұстаздар Абишева Л.Ж., Максутова А.Н., Қошым А.М., Қайролла З.Н. жетекшілігімен «Сөз маржаны» жобасының тұсаукесері жасалды. Жобаның бір бағыты қазақтың ұлы ақыны Абай Құнанбайұлының 175 жылдық мерейтойына арналды. Мектебіміздің кішкентай бүлдіршіндері мың бұралып биден шашу тарту етіп, мектеп мақтанышы Жиенбаев Алтынбектің әсем әнімен ажарлана түсті. Сонымен қатар қазақтың салт-дәстүрлері мен ұлттық ойындары көрсетілді. Мектеп ұстаздары «Балалық шаққа жол» тақырыбында монолог оқыды. Мерейтойға арналған әзілдерімен мектептің «Жұрттың балалары» КВН командасы концерттің ажарын одан әрі кіргізе түсті. Концерт соңында ұстаздар 50 жылдық мерейтойға арналған «Мектебім-алтын ұям, 65-ім» атты арнау әнін хормен орындады. Ұйымдастырылған игі шара өте жоғары деңгейде өтті. Келген қонақтар, ардагер ұстаздар мен мектеп ұжымы, түлектер естелікке суретке түсіп, қуанышты көңіл-күймен тарады.