Қазақ елінің біртуар ұлы, талантты жазушы, белгілі журналист Саттар Ерубаевтың туғанына 100 жыл. Осыған орай 2015 жылдың наурыз айының 16 жұлдызында №34 негізгі орта мектепте қазақ тілі мен әдебиеті пәнінің мұғалімі М.К. Рахымжанованың ұйымдастыруымен 7-сынып оқушылары арасында қазақ әдебиетіне өзіндік үлес қосқан қарымды қаламгердің 100 жылдығына арнап «Арманының ақ желкені асқақтап» атты әдеби кеш өтті.

     Әдеби ортаға тұлпар шабыспен екпіндей келген қаламгер, бар болғаны 24 жыл ғұмырында соңына өшпес мұра қалдырды.Қазақ әдебиетінің аспанына жарқ етіп көтеріліп, бірақ лезде жалт етіп ағып түскен жұлдыздарының бірі, өмір дегенде өксігін баса алмай, өнерінің барлық гүлін аша алмай арманда кеткен.

     Кеш барысында оқушылар ақынның өмір жолы мен шығармашылығы туралы кең түрде мағлұматтар ала отырып, «Мәңгілік өмір», «Үш шахтер туралы» баллада, «Өмір көркемдігі» сынды өлеңдерін жатқа оқыды. Сонымен қатар, оқушылар ақынның өмірі мен шығармашылығы жайында әзірлеген өз шығармашылықтарымен де (презентация, слайд-фильмдермен)бөлісті. Сондай-ақ оқушылардың орындауында қаламгердің «Не айтар еді?» шығармасы бойынша көрініс қойылды.  Қойылым барысында оқушылар образға ене отырып, әртістік шеберліктерін көрсетті. Кеш соңында оқушылар Саттар Ерубаевтың өмірі мен шығармашылығына арналған кітап көрмесімен танысты.

     Мазмұны терең іс-шараға қатысқан оқушылар рухани сусындап қана қоймай, қаламгер шығармаларына деген сүйіспеншіліктерін де арттыра түсті. Ақынның өнегелі өмір жолы мен артына қалдырған бай мұрасы - оқушысын жақсылыққа, адамгершілікке, Отаншылдыққа, еңбекқорлыққа баулитын қымбат қазына, рухани азық екенін, сонымен бірге біздер үшін тәрбиелік мән - мағынасының да зор екендігін ұғындық.