«Менің қалтамдағы ақшам»

2025 жылдың 13 қарашасында оқушылардың қаржылық сауаттылығының негіздерін қалыптастыру, ақшаға ұқыпты қарау және жеке шығындарды ұтымды жоспарлау мақсатында 5–6 сынып оқушылары арасында математика пәнінің мұғалімі Көкенова Э.С. «Менің қалтамдағы ақшам» атты сыныптан тыс іс-шара өткізді.

Іс-шара қызықты әрі танымдық түрде өтті. Оқушылар жеке қаржы тақырыбына байланысты викториналарға, қызықты тапсырмалар мен математикалық есептерге белсене қатысты. Балалар табыс пен шығын ұғымдарын, бюджетті не үшін жүргізу қажет екенін, қалта ақшасын дұрыс бөлудің және жинақтаудың тиімді тәсілдерін үйренді.

Алған білімдерін бекіту мақсатында «Ақылды сатып алушы», «Қаржылық эстафета», «Өз бюджетіңді есепте» атты ойын түріндегі байқаулар өткізілді. Әсіресе өмірлік жағдаяттарды талқылау барысында оқушылар шығын мен жинақ арасындағы теңгерімді шешім қабылдауға машықтанды.

Іс-шара оқушылардың ақшаны ұтымды пайдалану, жауапкершілік пен дербестік сияқты практикалық дағдыларын дамытуға ықпал етті. Барлық қатысушылар жағымды әсер алып, естелік сертификаттармен марапатталды.