Алматы қаласында Қазақстан Республикасы Халық әртістері Шабал Бейсебеков және Кәукен Кенжетаев атындағы Бірінші халықаралық ән байқауы өтті. Дүбірлі доданың П.Чайковский атындағы Алматы музыклық колледжі қабырғасында өтуі де кездейсоқ емес.Себебі қазақ өнерінің қос жұлдызының шығармашылық өмірі аталған өнер ордасымен тығыз байланыста.

22 ақпан мен 2 наурыз арасында өткен байқауға алыс жақын шет елдің «сен-тұр, мен атайындары» тегіс жиналды. Басты мақсат жас дарындардың жұлдызын жағу. Дүбірлі дода «Домбырада ән салу», «Академиялық вокал», «эстрадалық вокал» номинациялары бойынша 10 күн бойында Алатаудың етегін әнмен тербетті. Халықаралық байқауға Рамазан Стамғазиев, Гафиз Есимов, Ескендір Хасанғалиевтер қазылық етті. Байқаудың барысында Рамазан Стамғазиев, Ескендір Хасанғалиевтар жетекшілерге арналған шеберлік сағаттарын өткізіп, шәкірт тәрбиелеудегі тәжірибелерімен бөлісті.

Сайыс қатысушылары 1 айналымда қазақ халық әнін эстрадаға лайықтап орындаса, 2 айналымда таңдау бойынша ән салу керек болды. «Жүйріктен жүйрік озар жарысқанда» демекші, аталған өнер бәйгесіне Қарағанды облысының намысын қорғап барған Оспанова Жамиля «Эстрадалық ән салу» номинациясы бойынша ІІ орынға ие болды. Сондай-ақ жетекшісі Төлеубаев Жанболатқа арнайы Сертификат, №101 мектеп-лицейіне «Алғыс хат» табыс етілді. Жүлдегерлерге арнайы дипломдар мен ескерткіш сыйлықтар табыс етілді.