Амал — ол ата-бабаларымыздың қытымыр қысты шығарып сап, көктем кірісімен «Амал келді, жыл келді» деп ежелден тойлап келе жатқан мерекесі. Бұл мейрамның өзіндік ерекшелігі — көрші-көлем, ағайын тумалармен қол алысып, иық қағыстырып көрісіп, жасы үлкен ақсақалдарға қол ұсынып сәлемдесіп, олардан ақ баталарын алу болып табылады. 

    Мектебізде 14-наурыз күні осы мерекені дәріптеу мақсатында көрісу рәсімі көрсетілді.  Ұстаздарымыз оқушыларымызға «Жас қайырлы болсын!» деген тілегімен бастаса, оқушылар бір-біріне «бір жасымыз құтты болсын» деп төс қағыстырып, қол алысып амандасты, саулық сұрасты. Шара барысында қасиетті қара домбыра мен киелі қобыз аспаптарында талантты оқушыларымыз күй орындады, әнші қыздарымыз Наурыз туралы ән шырқады. Ең соңында қазақы әдет бойынша баршаға «Ұлыс оң болсын»-деп бастап қазақ тілі мұғалімі бата берді. Сонымен қоса, жиналғандарға ыстық бауырсақ үлестірілді.

       Көрісуді көрсеткен 11-сынып оқушылары бұл рәсімнің жастарға берер тәрбиесінің мол екенін айтып, оқушыларды бауырмалдылыққа, бір-бірімен етене араласуына, ауызбіршілікке шақырады,-деген пікірлерін жеткізді.