Мектептегі тарих апталығына байланысты өтіп жатқан іс-шаралардың тағы бір кезеңінде 10.12.2021 күні тарих пәнінің мұғалімдері Имашев Арман Аманович пен Балкеев Жанатбек Саримович оқушыларды «Долинка» елді мекеніндегі Карлаг мұражайына апарды. Карлаг, яғни, Қарағанды еңбекпен түзеу лагері - ГУЛАГ архипелагы құрамындағы ең ірі азап аралы. Ол кезінде Қазақстанның орталығында солтүстігі мен оңтүстігіне шейін 300 шақырым, шығысынан батысына шейін 200 шақырым ұлан-ғайыр жерді алып жатқан. Ал сыртқарғы Ақмола және Балқаш бөлімшелерін қосып есептегенде, Карлагтың ауқымы Францияның жер көлемімен теңеcеді. Қарағанды лагері ауқымына, құрылымдық жүйесінің күрделілігіне және Мәскеуге ғана тікелей бағынған әлеуетіне қарай «мемлекет ішіндегі мемлекет», ал азаптау құралының күштілігі жағынан «Даладағы тамұқ» деген атқа ие. Экскурсия барысында экскурсия жүргізуші оқушылар назарына жоғарыдағыдай ақпараттар ұсынды. Алаш қозғалысының өкілдері жайында тарих пәнінің мұғалімдері қосымша ақпарат берді. Мұражайға жасаған экскурсия оқушылардың тарихқа деген дүниетанымдық қызығушылықтарын арттыра түсті.