2016 жылдың 07 мен 12 қарашасы күндері аралығында мектебімізде ұлы классик жазушымыз, табиғаты өзгеше талант иесі, дархан даламыздың дүбірлі дүлдүлі Ғабиден Мұстафиннің туғанына 114 жыл толуына байланысты дәстүрлі «Ғ.Мұстафин апталығы» өтті. Арқалы қалам иесінің шығармаларының ізімен қазақ тілі мен әдебиеті пәндерінің мұғалімдері біршама шығармашылық шараларын алға тартса, өмірі мен еңбек жолы мектеп оқушыларының апталыққа арнаған еңбектеріне арқау болды. Атап айтатын болсақ әдістемелік бірлестік жетекшісі Ищанова Калима Бексеитовнаның жетекшілігімен апталықтың өтілуі бойынша жоспар құрылып, ол жоспарда қамтылған шаралардың барлығын жүзеге асыруға тіл мамандары белсене ат салысты.

Қазақ тілі мен әдебиеті пәні бойынша өтетін апталықтың жоспары

Аптаның алғашқы күнінен бастап ақ жоспарға сәйкес шаралар басталып та кетті.«Дүбірлі дәуір жаршысы – Ғабиден Мұстафин» айдарымен ұсынылған шара Ғ.Мұстафин кабинетінің меңгерушісі Айжан Абдрасилованың "Өлді деуге бола ма айтыңдаршы, өлмейтұғын артына сөз қалдырған!" - деп Абай атамыз айтқандай бүгінгі кешіміз өзіміздің жерлес классик жазушымыз Ғабиден Мұстафин жайлы болмақ» деген сөздерімен басталды. Кешке қатысқан жоғары сынып оқушылары Ғабеңнің өткен өмір жолы, шығармалары жайлы айтылған деректерді тыңдай отырып, өздері де әңгімеге шебер қатысты.

«Ғабеңнің терең ойлы бір романы – "Қарағанды",

Сонда жазған шахтердің сырын біліп, көмір қазған.

Қалың жұрт, қалың еңбек теңізінің,

Тергендей тереңінен інжу-маржан...  деп салды өз ойларын ортаға оқушыларымыз.

Ұлы жазушының бойынан табылған асыл қасиеттерімен, табиғи болмысымен таныстыру арқылы оқушылардың бойында адамгершілік ар-ұждан қалыптастыруды мақсат еткен әріптесіміз Агадилова Жанар Битымбаевна өз кезегінде Ғ.Мұстафиннің шығармашылығына шолуды 8-сынып оқушылары арасында шебер жүргізе білді. “Жазушылық – нан табудың кәсібі емес, адам жанын тәрбиелейтін мейлінше нәзік, күшті құрал жасау өнері” деген сөздері ұстаз бен шәкірт арасындағы қызу әңгіменің басты тақырыбына айналды.

«Зерделі сөз зергері – Ғ.Мұстафин». Бұл Нұрлыбаева Зибагүл Лесбаевнаның 8А сынып оқушыларымен өткізген сыныптан тыс жұмысының тақырыбы. Шара барысында «Ойсыз күні болмаған» жазушының өмір жолы сырмалы сызбалар, көрнекі кестелер түрінде беріліп, оқушылардың ұстаз тарапынан берілген сауалдарға кідірместен жауап берд. Бұл – жас ұрпақ ұлы жазушының шығармашылығына үлкен қызығушылық танытатындығының айғағы болды.       

Ғабиден Мұстафиннің өмір жолын дәріптеуден тек жоғары сынып оқушылары ғана емес, сонымен қатар жас бүлдіршіндеріміз де құр алақан емес. Атап айтсақ, 3Б сынып оқушылары ұстаздары Молдабекова Күлжәкен Жолтаевнамен бірлесе отырып өз білімдерін ортаға салды. «Әдеп басы – тіл» айдарымен өткен сайыс жас буын өкілдерін ойланта отырып ойнатқан, білімге деген қызығушылықтары мен жаңашылдыққа деген құштарлықтарын ұштастырған көңілді шаралардың бірі болды.

Келесі кезекте дәстүрлі мектепішілік «Ғабиден Мұстафин оқулары» өткізілді. Бұл жыл сайын мектебімізде ұйымдастырылатын қалалық «Ғ.Мұстафин оқуларының» іріктеу сыны болып табылады. Байқауға бастауыш мектеп оқушылары тартылып, оның ішінде оқу мемлекеттік тілде жүретін бастауыш сынып оқушылары аса жоғары дайындықпен келгендіктерін байқатты. Байқауды ұйымдастырған әріптестеріміз Г.Ш.Нұрмағанова мен З.У.Жолжанова тарапынан мәнерлеп оқу шеберлігімен ерекшеленген оқушыларға жүлделі орындар белгіленіп, белсене қатысушыларға алғыс хаттар табысталды.

Апталықтың соңғы күнінде «Ғ.Мұстафиннің шығармаларының ізімен» жасалған туындылар, нақты айтатын болсақ мектеп оқушыларының қалам, қарындаштарынан туындап, көпшіліктің назарына ұсынылған қабырға газеттеріне де өз бағасы берілді. Ұлы жазушының «Миллионер», «Дауылдан кейін», «Қарағанды», «Көш» т.б. шығармалары оқушы еңбектерінің басты тақырыбы болды. Байқауды ұйымдастырушы мұғалімдер М.А.Гайнуллина мен А.А.Бейсембаева қабырға газеттерінің тақырыбы, мазмұны, рәсімделуі жағын ескере отырып жұмыстарға тиісті бағасын берді. Сайысқа түскен барлық сыныптар жүлделі орындарды өзара бөлісті.

            Жалпы апталықтың дүбірлі де жырлы, мазмұнды да мәнді өтуіне мүмкіншілік тудырып, жағдай жасаған мектеп әкімшілігіне, оқушы дайындап, асқан жауапкершілік танытып, ат салыса қатысқан белсенді әріптестерімізге, оның ішінде осы шараларды жоспарлап, жоғары деңгейде өтуін жіті қадағалап, жанашырлық танытқан қазақ тілі мен әдебиеті ӘБ жетекшісі Ищанова Қалима Бексеитовнаға жығылмас жігер, телегей табыс, қайтпас құзірет, шыңдалған шығармашылық болғай дейміз!!!

Апталық материалдарын жинақтап, шолу жасаушы:

Кокина Акзер Зарыкбековна, қазақ тілі мен әдебиеті пәндерінің мұғалімі