«Орталық Қазақстанның алты киелі орны» 
Рухани жаңғыру өскелең ұрпақтың - дара жолы!
Рухани жаңғыру - болашаққа батыл қадам (Нұрсұлтан Әбішұлы Назарбаев) 
Рухани жаңғыру – адам баласының оның ішкі әлемінің жаңаруы, сана-сезімі, жаңа өзгерісті қабылдай білуі. «Жаңғыру» атаулыға бұрынғыдай тарихи тәжірибе мен ұлттық дәстүрлерге шекеден қарамауға тиіспіз. Керісінше, замана сынынан сүрінбей өткен озық дәстүрлерді табысты жаңғырудың маңызды алғышарттарына айналдыра білу қажет. Егер жаңғыру елдің ұлттық-рухани тамырынан нәр ала алмаса, ол адасуға бастайды.
Жас ұрпаққа сапалы білім саналы тәрбие беруде № 32 ЖББ ОМ КММ ұжымы да өз үлесін қосуда. Елбасының «Ұлы даланың жеті қыры» мақаласында:«Біздің жеріміз материалдық мәдениеттің көптеген дүниелерінің пайда болған орны, бастау бұлағы десек, асыра айтқандық емес» деп айтқанындай, мектеп оқушыларына, ұжымға, мектепке келген қонақтарға тұрғылықты өлкеміздің тарихын насихаттауға және оқушыларды ғылыми жобаларға бағыттауға өз ықпалын тигізеді деген мақсатпен, осы «Орталық Қазақстанның алты киелі орны» атты тарихи бұрыш жасалды. Бұл жалғыз орталық Қазақстанның емес, бүкіл еліміздің мақтанышына айналған дүние жүзіне аты мәлім тарихи тұлғалардың соңғы тұрағына айналған мекенін реконструкция жасап, оны мектебіміздің екінші қабатының дәлізіне орналастырдық. Әрбір кесенені таңдау барысында тарихтың әр кезеңін қамтыдық, мәселен Домбауыл кесенесі 8-9 ғасырларға жататын болса, Құнанбай мешіті 1850 – 1851 жылдар аралығында салынған. Онан бөлек орта ғасырлық Жошы мен Алаша хан кесенелері және жоңғар шапқыншылығы кезеңінде батырлығы және шешендігімен танылған жерлесіміз Сеңкібай батыр кесенесінің де макеті жасалды. Мектептің мемлекеттік тілде жұмыс атқаратын мұғалімдері осы игі бастаманы қолға алып, наурыз мейрамы қарсаңында салтанатты түрде ашылу жоспарланған еді. Алайда елімізге келген індетке байланысты ашылу салтанаты кейінге қалдырылды. 
Қазіргі таңда алты кесененің реконструкциясы және орналасу картасы дайындалып, өз орнына қойылды. Алдағы уақытта тарихи пано жасалып, сөрелерге өлке тарихынан сыр шертетін экспонаттармен толықтырылып тарихи бұрыш тарихи музейге айналады деп ойлаймыз.