«Тәуелсіздік - тал бесігім»        

         Тәуелсіздік – бабалар аңсауы, ұрпақтың қолы жеткен киелі кезең. Тәуелсіздік – таңбасы таста, қаны қара жердің тамырында жатқан құдіретті сөз. Еліміз тәуелсіздіктің бесігінде тербелгелі биыл 29 жыл. Жиырма тоғыз жыл ішінде Қазақстан етек-жеңін жиып, шекарасын бекітіп, өз алдына дербес зайырлы ел болды. Бұл атадан келе жатқан ұлы жеңістің жемісі. 1991 жылы 16 желтоқсанда егемендігін алған еліміздің өз президенті, ұлты мен ұлысы, салты мен дәстүрі, мәдениеті мен экономикасы болды. Желтоқсанның желі мен ызғарына қарсы тұрған жастардың жалынды рухы мен ерліктерінің арқасында шаңырағы биік, керегесі кең мемлекет болып қалыптастық. 

         Міне осы егемендіктің арқасында 2020 жылдың 18 желтоқсан күні №86 орта мектебінде «Қазақ халқының мұрасы-Мәңгілік ел» кітаптар сериясының авторы Нұржан Сұршаұлының бастауымен Тәуелсіздік лентасының таныстырылымы өтті. Кездесу инстаграмм, фейсбук парақщаларында жүзеге асты. Әуелде аталмыш лентаның тұсаукесері Н.В.Гоголь атындағы Қарағанды облысының бас кітапханасында өткен болатын. Халқымыздың мерейін асырған осы жаңалықты естіп біз де тыныш таба алмадық. Яғни, жаңа келіннің бетін ашқандай Қарағанды облысының мектептері арасынан бірінші болып өз оқушыларымызға таныстыруға асықтық. Біздің ұсынысымызды қуана қабылдаған Нұржан Сұршаұлымен бірге «Бөрілі байрақ» қоғамдық қозғалысының жетекшісі, ел ағасы Ахмет Қаленов және «Saryarqa» арнасының тілшісі Жаңабек Нұртайұлы келіп, мектеп оқушыларына жылы лебіздерін білдіре отырып, Тәуелсіздік лентасының маңыздылығы мен облыс, республика бойынша таратылуы жайлы мәселелерді айта кетті.

          «Қазақ халқының мұрасы-Мәңгілік ел» кітаптар сериясының ғана емес, таныстырып отырған Тәуелсіздік лентасы идесының да авторы болып табылатын Нұржан Сұршаұлы ағамыз бүгінгі қоғамдағы жастардың Тәуелсіздік ұғымын қалай түсінетіні жайлы, аталмыш лентадағы бейнелердің маңызы, мақсаты мен оны қалай тағу, қайда тағу қажеттігі туралы оқушыларға онлайн кездесуде жете баяндап берді.

         Жалпы, әлеуметтік парақша арқылы өткен онлайн кездесуге 106 адам қатысты. Қатысушылар әр түрлі қызықты сұрақтар қойды. Қонақтарымызға қойылған сауалдардың ұнағаны сонша, үздік сұрақтар үшін оқушыларға сый сыяпат берілетіні жөнінде айта кетті.

         Қорытындысында, Тәуелсіздік – ащы термен келген тәтті жеңіс, төгілген қанның, өлмеген жігердің отымен келген ұлы күн екенін айта отыра, егемендігімізді бағалау қажет екенімізді қонақтарымыз тағы бір мәрте еске сала кетті.  Кездесуге келген қонақтар тәуелсіздік лентасын сыйға тартып, мектеп ұжымына зор алғысын білдіріп, үлкен әсермен эфирді аяқтады.