«Уа, һәкім ,сен жайлы ода көп»

         «Туады, туады әлі нағыз ақын,

Нағыз ақын бал мен у тамызатын,

Жесірдің айырылмас сырласы боп,

Жендеттің көзінен жас ағызатын,

Туады, туады, әлі атылғанда,

Атылғанда, - аспаннан оқылғанда,

Мылқауларға тіл бітіп, керең естіп,

Жанар пайда болады соқырларға!»- деген, Мұқағали да көзі тірісінде осындай бір оғланды күткен болар? Мен осы ақынды жиырма алты жыл күтіп едім, - келді... – деп жазады ақын С. Ақсұңқарұлы Бағдат Мүбәрактың «Алтынкүрек» атты жыр жинағының алғы сөзінде.

         Бағдат Мүбәрактың поэзиясы табиғатқа таңдаданып, әділетті аңсаған, сұлулығына сүйсінген суреттеуі ұлттық мінез бен өршілдікке ұласқан. Бүгінде қазақ поэзиясында қадамы бөлек, өзінің өзекті жырларымен елдің көзқуанышына айналған ақын.

         2020 жылы 04 желтоқсан күні ZOOM платформасында «Жыр жалын» поэзия әлемі мен «Өнегелі өмір» жобаларының аясында «№86 ЖББОМ» КММ-де Қазақстан Жазушылар Одағының мүшесі, ақын Бағдат Мүбәракпен «Уа, һәкім, сен жайлы ода көп»атты онлайн-кездесуі өтті. Кездесу тақырыбы ұлы ақын, ғасыр һәкіміне айналған Абай Құнанбайұлына арналған болатын. Б.Мүбәрак «Ақындардың ақыны – Абай туралы шайырдан сұрамасақ айып болар. Сіздің ұғымыңыздағы Абай қандай?» секілді сауалдарға тебірене жауап бере отыра, Ұлы ақынға арнаған «Мұң шағу» өлеңін өзіндік айрықша мәнерімен, терең толғанысымен оқып шықты.

         Кездесуге мектеп мұғалімдері мен 7-9 сынып оқушылары қатысты. Сөз кезегін алған 7 «А» сынып оқушысы Құрбанова Жаннұр ақынның «Балауса қыз» өлеңін нақышына келтіріп оқыса, 9 «Ә» сынып оқушысы Макшунова Камила «Қараша ауыл» өлеңін оқып ақынның жүрегін тебірентті. Оқушылар қазақ поэзиясына өзіндік қолтаңбасымен келген ақын жырларының өзіндік өзгеше бітім-болмысын әсерлі баяндап, автордың мерейін үстем етті.

         «Жыр жалын» поэзия әлемі клубының жас өнерпаз балалары да бұл кездесуден қапы қалмады. 8 «А» сынып оқушысы Жеңісбек Айтбек ақынға деген  жүрекжарды лебізін білдіре отырып, бойындағы поэзияға деген махаббатын өзі жазған өлеңі арқылы жеткізді. Бағдат Мүбәрак жас буынның бетін қайтармай, белін буып, жазған шығармасындағы ерекшеліктерді талдай отыра, «Өркенің өссін, ақын бол, дана бол» деп ақынжанды балаға ақ батасын берді.

         Сондай-ақ көз көрген ақын оқушыларға «Қасым», «Жұлдыз», «Жалын» республикалық әдеби журналдарымен, мектеп кітапханасымен дос болу қажет екенін айтта кетті.

         Ақынмен кездесу онлайн форматта өткенімен, тікелей толқынға қатысып отырған мұғалімдер мен оқушылардың көңілінен шықты. Бағдат ақын кештің қорытындысын өз өлеңімен аяқтап, қатысушыларға жылы тілегін жеткізді.