27 ақпан күні №86 ЖББОМ-те Елбасының «Туған жер» бағдарламасына сәйкес туған өлкемізден түлеп ұшып, ел мақтанышына бөленген ақындарға арналған зал ашылды.Ашылу рәсіміне арнайы алаштың айтулы ақыны Серік Ақсұңқарұлы келіп, ізгі тілегін білдірді. Ұрпақ үшін сіңіріп жатқан мұғалімдердің еңбегін зор бағалады. Залға Бұқар жырау бабамыздың, Қаз дауысты Қазыбек бидің, Шортанбай Қанайұлының, Сәкен Сейфуллиннің, Баубек Бұлқышевтың, Қасым Аманжоловтың, Жеңіс Қашқыновтың, Серік Ақсұңқарұлының, Абзал Бөкеннің, Жүрсін Ерманның, Ғалым Жайлыбаев туралы мағлұматтар қойылып, оқушылар әр тұлға жайлы әңгімелеп берді.

             Сонымен қатар қазіргі Қарағандылық ақындардың бірі, ақын, жазушылар одағының мүшесі Қайрат Асқаровтың шығармашылығына арналған әдеби-сазды поэзия кеші болып өтті. Қалалық білім бөлімінің жоспарына сәйкес өткізілген іс-шара жоғары деңгейде өтті. Мектебіміз ақынын ұлықтаған, ардақтаған күн болды. 2017 жылдың  14 сәуірінде «Жыр Жалын» поэзия отауы «Рухани жаңғыру» бағдарламасына сәйкес «Оқу шаттығы» жобасы аясында құрылған болатын. Бүгінгі күні поэзия отауында отызға жуық оқушы өнерге, әдебиетке қызығушылықтарын арттыруда.

«Жыр Жалын» поэзия отауының оқушылары ақын Қайрат Асқардың өлеңдерін мәнерлеп оқып, қала мектептерінен келген мұғалімдердің ризашылығына бөленді. Ақын да осындай оқырмандары барына ықылас-тілегін  білдірді. Кешті Қалалық білім бөлімінің әдіскері Г.Б.Жаркеева ашып, поэзия отауының жұмысы туралы айтып өтті. Ақынның сөздеріне жазылған әндерді облыстық филармонияның әншісі Ербол Алшынбаев, Тәттімбет колледжінің ұстазы Абдуалиева Г., Дүйсенбеков Қ. орындады. Мұғалімдер мен оқушылар ақынға көкейлерінде жүрген сұрақтарын қойып, тұшымды жауап алды. Әсіресе кешке журналист, аудармашы Қашқынов Ернат Мелісұлы бас қаламыз Астанадан арнайы келіп, «Жыр Жалын» поэзия отауының өскелең ұрпақ үшін жасап жатқан игі істеріне бағасын берді. Поэзия кешінің соңында ақын Қайрат Асқардың өнердегі ұстазы, алаштың айтулы ақыны Серік Ақсұңқарұлы жырдан шашу шашты. Мектеп ұжымы қос ақынның иығына шапан жауып, жыр кеші соңы Қайрат Асқардың «Сарыарқа» әнімен  әуеледі.