«Жас патриоттар» академиясы ұжымының 10 жылдық мерейтойы аясында өткен республикалық конференция – жас буынның бойындағы отансүйгіштік қасиетті нығайтуға бағытталған тағылымды әрі мазмұнды басқосу болды. Аталған маңызды жиынға Қарағанды облысы атынан үшінші гимназияның оқушылары қатысып, осы бағытта атқарып жүрген жүйелі жұмыстарын жоғары деңгейде қорғап, терең білімдері мен айқын көшбасшылық қабілеттерін көрсетті.

Конференция барысында білім алушылар патриоттық тәрбие, азаматтық жауапкершілік, ұлттық құндылықтарды дәріптеу, еріктілер қозғалысы және әлеуметтік жобалар аясындағы тәжірибелерімен бөлісті. Ұсынылған жобаларда туған өлке тарихын зерттеу, ұлттық дәстүрлерді жаңғырту, қоғамдық белсенділікті арттыру, жасөспірімдердің бойында адалдық пен әділдік қағидаларын қалыптастыру мәселелері кеңінен қамтылды.

Бұл шара білім мен тәрбиені ұштастыра отырып, талантты жастардың шығармашылық әлеуетін ашуға, зияткерлік мүмкіндіктерін дамытуға зор серпін берді. Сонымен қатар жас буынды елін, жерін сүюге, тарихы мен салт-дәстүріне құрметпен қарауға тәрбиелеудің маңызын айқындады.

Ұйымдастырушылар арнайы төсбелгімен Хален Досханды, Шынтемір Шахисламды, Талғатбек Ержігітті, Тлеубердиева Ақеркені және Берік Айаруды марапатталды. Бұл – олардың еңбегі мен белсенділігінің лайықты бағасы. Сонымен қатар, олар «Жас патриоттар» академиясының мүшелігіне қабылданып, елжанды, жауапты жас буын қатарын толықтырды.

Осындай тағылымды іс-шаралар жас патриоттардың азаматтық ұстанымын қалыптастырып, олардың болашақта ел дамуына үлес қосатын саналы, білімді, жауапты тұлға болып қалыптасуына берік негіз қалайды.