1 наурыз - "Алғыс айту күні" мерекесі биылғы ерекше аталып өтуде. Бұл мерекенің шығу тарихы Қазақстан халқы Ассамблеясының құрылған күнімен тікелей байланысты. 2020 жылы Ассамблеяның құрылғагына 25 жыл толып отыр. Елбасымыздың бастамасымен 1995 жылы 1 наурызда бейбітшілік пен ұлттар арасындағы достықты нығайту мақсатында Қазақстан халқы Ассамблеясы құрылған болатын. Бүгінгі күні Ассамблея елдің даму жолында маңызды рөл атқарып отыр.

Айтулы мерекеге орай гимназия оқушылары еңбек және тыл ардагері, 100ге толған, еліміздің нағыз патриоты Огай Оксермен кездесті. 1937 жылы, яғни кешегі қилы заманда тағдырдың жазуымен қазақ еліне депортацияланған 16 жасар Оксердің бүгінгі таңда 13 немересі, 23 шөбересі, екі қызы, бір ұл баласы бар.Әңгіме барысында ғасырлық әжеміз барлық өмірбаянын, өткен қиын жолын баяндап берді. Ең бастысы, қазақ халқының сол қиын -қыстау кезде қол ұшын беріп, құшақ жая қарсы алғанына күні бүгінге дейін ризашылығын білдіретінін айтып өтті. Бала кезден еңбек сүйгіш Оксер, Ұлы Отан соғысы кезінде фабрикада тынбай жұмыс істеп, сол үшін Тыл ардагері атанғанын да айтып өтті. Оқушылар қонаққа сый-құрмет көрсетіп, ән мен биден шашу шашты. Ғасырлық тарихы бар әжейді сұрақтың астына алып, бір ән салып беруін сұрады.Көңілді, ақжарқын, белсенді қонағымыз оқушылардың көңілінен шықты. Кездесудің соңында Огай Оксер қатысушыларды мейірімділікке, достыққа, татулыққа шақырды. "Барлық адамдарға жақсылық ойлап, игі іс жасаған адамның ғұмыры ұзақ болады " деп сұхбатын аяқтады.