Гимназиямызда 11 ақпан күні «Ерлік ешқашан ұмытылмайды» атты тақырыпта ауған соғысының ардагерлерімен кездесу өтті. Кездесудің мақсаты ауған соғысына қатысқан ағаларымыздың ерлігін кейінгі ұрпаққа үлгі ете отырып, жастарды ерлікке баулу, соғыс ардагерлеріне құрмет көрсету.
Кездесуге өмірінің өлшеулі бір бөлігін, жалындаған жастық шағының жартысын оқ пен от арасында өткізіп, елге аман-сау оралып, туған жерінде еңбек етіп, болашақ ұрпақты тәрбиелеуге өз үлестерін қосқан ардагерлер Ғ.Жакупов, Ж.Әбішев, Н.Маханов, И.Молодов, С.Скалдуцкиймен қатар Қазақстан халқы Ассамблеясының жанындағы аналар кеңесінің мүшесі, солдат аналары қоғамының төрағасы М.Д.Фатеева, 1983жылғы мектеп түлегі И.А.Воробьева және ата-аналар қауымы келді.

Ауған соғысы ардагерлері өз естеліктерімен бөлісіп, ерліктері туралы баяндап, оқушыларды өз Отанын сүюге, өз елінің патриоты болуға, бейбіт өмірдің бағасын білуге шақырды.
Бұл кездесуге оқушылар, ұстаздармен қатар ата-аналардыңда көмегі көп болды. Мектебіміздің 1983жылдың түлегі, ауған соғысының батыры Геннадий Кузнецов Генадиевичтің сыныптасы, ақын И.А. Воробьевамен бірге гимназиямыздың мұражайында Г.Кузнецовтың жеке бұрышын ашуға материалдар жиналып, бірқатар ақпараттарды альбом беттеріне үлестірді.

Соның нәтижесінде И.А.Воробьева мен ардагер С.В.Скалдуцкий мектебіміздің мұражайында Г.Кузнецовтың жеке бұрышын салтанатты түрде ашты.

Ардагерлермен сұхбаттан кейін оқушылар ауған соғысының зардабы мен жауынгерлердің батырлығын дәріптейтін өлеңдер оқып, биден шашу шашты. Жоғары деңгейде өткен, тәрбиелік маңызы зор кездесу болды.

Өз Отанына шексіз берілген, патриоттық рухы жоғары, қайсар жауынгер ағалардың ерлігін үлгі ету, Ауған соғысында опат болған жауынгерлердің рухына тағзым ету, есімдерін қастерлеу, басы аман, бауыры бүтін көзі тірілеріне құрмет көрсету ҰРПАҚ ПАРЫЗЫ!