Сәуір айының 14-ші жұлдызында біздің мектеп қабырғасында «Білім деңгейі жоғары оқушылармен жұмыс жүргізу әдістері– мұғалімнің құзырлылығының көрсеткіші» тақырыбында қазақ тілі мұғалімдерінің қалалық семинары өтті. Семинарға қала мектептерінен 50-дей мұғалім қатысты. Семинар шеңберінде мектебіміздің әдістемелік бірлестігінің жетекшісі Гүлмира Сериковна Ақышеваның дарынды (білім деңгейі жоғары) оқушылармен жұмыс жүйесі туралы баяндамасы тыңдалып, 2 ашық сабақ қаралды.
Ашық сабақтың бірі 10-11 сынып оқушыларының қатысуымен өткізілген әдеби кеш болса, екіншісі 9 сынып оқушыларының арасында сайыс сабағы болды.
Әдеби кеш «От боп жанып кеткен ақынға, мәңгілік қып өмір берген өлеңді» деп аталып, Мұқағали Мақатаев өмірі мен шығармашылығына арналды. Кешті мектептің қазақ тілі мұғалімі, І санатқа өтініш жазған Бибігүл Зұфаровна Саметова ұйымдастырып, өткізді. Жоғары сынып оқушылары кеште ақын сөзіне жазылған әндерді тыңдады, айтты, өлеңдерін мәнерлеп оқыды, «Аққудың айрылуы» поэмасынан үзінді қойылымын көрсетті. Сыныптағы жайлы жағдай, жағымды әуен, Мұқаң өмірінің жан тербетер жайлары қатысушыларды тебірентіп өтті де, кештің жоғары баға алуына өз әсерін тигізді.
9 сыныптардан таңдалып алынған Анастасия Нешитова, Анастасия Соловьева, Лолита Баева, Наталья Швабауэр, Нелли Миллер, Юлия Нефедова, Яна Завгородняя сияқты білім деңгейі жоғары оқушылар «Мақтанышым – туған жерім» тақырыбындағы «Сиқырлы алаң» ойынында өзара жарысқа түсті. Жарыс : «Бой жазу», «Зерек», «Алғыр», «Білгір», «Практик», «Тапқыр» бағыттары бойынша өтіп, оқушылардың жылдам ойлау, мазмұнды сөйлеу, қорытындылар жасау қабілеттерін дамытуға бағытталды. Оқушылар сөздерге синоним тауып, сызбаға сәйкес сөздер құрып, берілген сөздерден болымсыз етістіктерді теріп, тақырып бойынша мәтін құрып, «Әдебиет», «Қазақ тілі», «Тарих», «Салт-дәстүр» бағыттары бойынша сұрақтарға жауап беріп, берілген сөйлемге сай сызбаны тауып, сөздің әріптерін қолдану арқылы жаңа сөздер жасап өзара жарысты. Әр кезеңнен кейін бір баладан ойыннан шығып қалып отырды. Ал ақтық кезеңге жеткен 3 оқушы өзара жарысып, 1 жеңімпаз анықталды. Ол 86 ұпай жинаған 9Б сынып оқушысы Баева Лолита болды. Барлық қатысушылар мен ойынға қазылық еткен № 30, 52 мектеп мұғалімдері, алқа көмекшісі Суюшкина Кристина тәтті сыйлықтармен, жеңімпаз бағалы сыйлықпен марапатталды. Тартымды да қызықты өткен ойын қатысушылардың жылы лебізіне бөленіп, жоғары баға алды.
Жалпы мектептің құжаттары, әдістемелік бірлестік жүйесі мен мүшелері, соңғы 3-4 жылда шығарылған әдістемелік жинақтары қатысушыларды тәнті етті.
