Көктем мерекесі - Наурыз мейрамын халық асыға тосады. Өйткені Наурыз - жыл басы, көктемнің ең көңілді де, шуақты мерекелерінің бірі. Пришахтинск Мәдениет үйінің алдында көптеген мектептер киіз үйлерін қаз-қатар тігіп, қазақтың салт-дәстүрін еске алды. Барлық жұрт қатарлы біздің №25 ЖББОМ ұжымы да Наурыз мерекесін өте көңілді қарсы алды. Киіз үйдің ішін әсем безендірілген, сол жақта құрылған шымылдық ішінде жаңа түскен жас келін, төрде бесікте жатқан жас нәресте, тәй-тәй басқан жас бала, іргеде ілулі тұрған қазақ халқының ұлттық киімдері, аң терілері және ұлттық аспап - домбыра, ортада жайылған ақ дастархан, сыртында түтіні будақтаған самаурын қазақ халқының өмірінен көрініс берді.

      Мұғалімдер ұлттық киімдерін киіп, келген қонақтарды иіліп қарсы алып, ыстық шай мен бауырсақтарын алдарына тосты. Сыйлы қонақтарды ұлттық тағамдар толы дастархан басына шақырып, басты тағам –бесбармақты алдарына тосты.

      Ұлттық тоғызқұмалақ, асық  ойындары ойналып жатты. Келін түсіру, бесікке салу, тұсау кесу сияқты салт-дәстүрлерінен көріністер көрсетіліп, халықтың ықыласына ие болды. Соның нәтижесінде мектебіміз Октябрь ауданының әкімі атынан алғыс хатпен сыйлыққа ие болды. Бұл құрмет - біздің ұжымның бірлескен еңбегінің, ұйымшылдығының нәтижесі деп ойлаймыз.