Академия «Bolashaq» с июня будет осуществлять прием абитуриентов по 9 образовательным программам бакалавриата, 4-магистратуры и одной докторантуры по областям образования «Педагогические науки», «Бизнес, управление и право» и «Здравоохранение и социальное обеспечение» (Гос.лицензия №Kz62LAA00016157 ГУ «Комитет по контролю в сфере образования и науки МОН РК» от 23.05.2019г).

Заман және нарық талабы

БЕЙІНДІ ОҚЫТУ барысында оқушыларға кәсіптік бағдар беру-

білім саласының басым бағыттарының бірі

Қазіргі таңда ел өміріндегі өркенді салалардың бірі білім беру жүйесінде Елбасының тікелей қолдауымен қолға алынып, қауырт жүзеге асырылып жатқан бейінді оқыту тәжірибесінің өскелең ұрпаққа берері мол.

Қазақстанда бейінді оқыту жүйесін дамытудың өзектілігі бірқатар факторлармен, соның ішінде 12 жылдық білім беру үлгісіне көшу, мектеп түлектеріне қойылатын уақыт талаптары, білім беру сатыларының сабақтастығының қажеттілігі сияқты негіздермен түсіндіріледі.

Мемлекет басшысы Н.Ә. Назарбаев Қазақстан хал­қына арналған «Әлеуметтік-экономикалық жаңғырту – Қазақстан дамуының бас­ты бағыты» атты Жол­дауында елімізде адами капиталдың сапалы өсуіне ерекше мән беріп, «Білім беру жүйесін жаңғырту барысында біз үшін келелі іс-шараларды жүзеге асырудың маңызы зор» деп, ұстаздар қауымының алдына аса маңызды және жауапкершілігі зор міндеттер белгіледі. Президент тапсырысын орындау мақсатында ҚР Білім және ғылым министрлігі облыстарда мектептерді бейімдеу картасын құрып, «Бейіндік мектеп» нормативтік базасын әзірлеген болатын. Соған сай жер-жерлерде бейіндеу орталықтары ашылды. Қаланың оңтүстік-шығысында орналасқан №5 мектеп облыс орталығында ашылған 4 бейінді оқыту орталығының бірі, осы жүйе бойынша тәжірибе алаңы болып табылады.  

Бүгіндері жоғары сынып оқушыларына арналған бейінді оқыту курстарын енгізу арқылы оқушыларды қалаған мамандықтарын еркін таңдауына ғана емес, мектеп қабырғасынан-ақ өскелең ұрпақты белгілі бір салаға бейімдеу ісі дұрыс жолға қойылып келеді. Мән-маңызына орай аталмыш іс-тәжірибеге республикалық деген мәртебе беріліп отыр. Қолға алған істі қоғам дамуының үрдістеріне сай жүргізу мақсатында орталықта «Бәсекеге қабілетті түлек, бәсекеге қабілетті маман, бәсекеге қабілетті ел» тақырыбында басқосулар, дөңгелек үстелдер жиі өткізіліп тұрады. Оның жұмысына жаңа жобаның әлеуметтік серіктестері, түлектері, ғылыми жетекшілері белсене қатысады. Мұндай екі жақты тиімді, ой бөлісу, пікір алмасу тұрғысындағы отырыстарда мамандар, шешендер тарапынан еліміздің әлеуметтік-экономикалық  дамуындағы жаңа бағыттарға сәйкес, орта мектеп түлектерін дайындау сапасына, олардың болашақ мамандық таңдауда дұрыс шешім қабылдауына деген талаптардың күшейгендігі атап өтілуде. Осыған байланысты, жалпы білім беретін мектептердің жоғарғы сыныптарындағы оқу сапасы бейіндік дифференциацияға негізделуі тиіс. Сонымен қатар, бейінді оқыту білім берудің сапасын арттырудың тиімді тетігі, жеке тұлғаның, қоғамның, мемлекеттің дамуындағы өзекті, перспективалы қажеттіліктерді жүзеге асырудың бірден бір оңтайлы тәсілі екені де баса айтылуда.

№5 мектеп жанындағы бейінді оқыту ресурстық орталығы жоғары сынып оқушыларына болашақ мамандықтарын өз еріктерімен таңдап қана қоймай, белгілі бір салаға өз бетінше бейімделуге мүмкіндік береді. Он екі мектептің басын қосып отырған орталықта автокөлік және коммуникация, бухгалтерлік есеп, кәсіпкерлік, киім пішу, медициналық қызмет, дұрыс тамақтану курстары ұйымдастырылған. Курстарды мектеп мұғалімдерімен қатар жоғары оқу орындарынан шақырылған білікті маман, оқытушылар жүргізеді. 

Елбасының жыл сайынғы Жолдауларында білім саласының өндіріспен байланысына қатты мән беріліп келеді. Өйткені, дәстүрлі білім берудің бір кемшілігі білім қазіргі таңда өндіріспен, өмірмен бірге, байланыста дамымай, алшақ кетіп отыр.

Мектептегі ресурс орталығы заман талабына сай жабдықталған. Бес кабинет, екі шеберхана, автокурс өткізу үшін екі көлік бар. Сонымен қатар мұнда қашықтан оқыту әдісі де енгізілген. Бұл оқушыға сабақтан тыс уақытта өз жетекшісімен байланысқа шығуға мүмкіндік береді.

Тәжірибенің әлеуметтік серіктестері қатарында Қарағанды мемлекеттік техникалық университеті, Қарағанды медициналық университеті мен Е.А. Бөкетов атындағы Қарағанды мемлекеттік университетінің оқытушылары да бар. Қарағанды медициналық университетінің маман-кадрлары салауатты өмір салты, медицина негіздерін жүргізеді.

2014-2015 оқу жылынан бастап бейінді оқыту орталығында кәсіптік бағдар беру, «Бастауыш мектеп: Педагогика және психология» мамандығы бойынша жаңа курс оқытыла бастады. Курстың мақсаты – оқушылардың кәсіптік бағдарын қалыптастыру, мектеп бітірушілерді педагогикалық мамандыққа бағыттау, оқушылардың  қызығушылықтары мен бейімділігін, қабілетін  анықтау.  Оқушыларда педагогикалық мамандық туралы дұрыс түсінік пен  көзқарастың қалыптасуына жағдай жасау. 

Аталған курсқа М. Жұмабаев атындағы  №39 гимназияның 10-сынып оқушылары мен №57 С. Саттаров атындағы мектеп-лицейінің 9-сынып оқушылары бар ынта-ықыластарымен қатысуда. Сабақ барысында оқушылар мен тәлімгерлер арасында жібек желідей жақсы байланыс орнатылып, талдау-талқыға түсіп отырған тақырып төңірегінде екіжақты еркін пікір алмасулар өркен жаюда. Қолға алған істің нәтижесіне қанаттанған маман, мұғалімдер бұл барыстағы ізденістерін індете, кеңейте түспек ниетте.

Бейінді оқы­тудың жаңа технологиясы мен әдіс-тәсілдерін білім беру үдерісіне тереңдете енгізу үшін пән мамандарының біліктілігін жетілдіруді де әркез естен шығармау керек. Бұл ретте ұлтымыздың ұлы ұстазы Ахмет Байтұрсыновтың: «Мектептің жаны – мұғалім. Мұғалім қандай болса, мектеп сондай болмақшы» - деген қанатты қағидасының маңызы тіпті арта түседі. Бала бойына ата-анадан кейінгі ақыл-ой, адамгершілік, әдептілік, ар-ұят, ұлттық сана-сезімді сіңіруші адам – Мұғалім. Ендеше өз ісіне берілген, жаңалықты жатсынбай қабылдайтын, шәкіртінің жанына нұр құйып, өмірде өзі де бақытты болып, өзгелерді де бақытқа жеткізсем деп жүретін ұстаздардың жөні де, жолы да бөлек. Ұстаз да диқан сияқты, әр адамның жанына білім дәнін себеді. Әр шәкіртін аялап өсіріп, өмір атты шексіз ғаламға топшысын қатайтып ұшырады. Нақтырақ айтсақ, адамды өмір сүре білуге тәрбиелейді. Сол үшін бойындағы асыл қасиеттерін шәкірттеріне сіңіріп, тер төгеді.

Бейінді оқыту ресурс орталығының «Педагогика және психология» курсының жетекшісі  Гүлсара ОСПАНОВА