Елбасы Н.Ә.Назарбаевтың Қазақстан халқына
2015 жылғы 30 қарашадағы
«Қазақстан жаңа жаһандық нақты ахуалда: өсу, реформалар, даму» атты Жолдауына
П І К І Р
«Елбасымыздың халқына жолдаған Жолдауы Қазақстанның әрбір азаматының болашаққа деген қадамдарын нық басуына ықпал етеді. Осындай бейбіт заманда көгімізде көк туымыз желбіреп, Елбасымызбен бірге әрдайым алға жүрейік ».
Елбасымыз қазіргі күрделі қаржылық жағдайды еңсерудің тиімді жолдарын ұсынды. Біз әрдайым ұлт көшбасшысымен біргеміз.
Елбасы Нұрсұлтан Назарбаев жариялаған Қазақстан халқына «Қазақстан жаңа жаһандық нақты ахуалда: өсім, реформалар, даму» атты жаңа Жолдауын аса ден қоя тыңдадық. Онда мемлекет басшысы дағдарыс қыспаққа алып тұрған кезеңде халықтың әл-ауқатын әлсіретпей, тығырықтан шығу жолдарын нақты көрсете отырып, Ұлттық валютаға деген сенімді нығайту өте маңызды екендігін және 30-шы қарашадан бастап Қазақстан ДСҰ-ның толық құқықты мүшесі болғанын атап өтті. Әрине, әлемде дағдарыс дендеп тұрған кезеңде, халықтың алдағы уақытта жағдайы қалай болар екен?- деген сауал бізді де мазалағаны рас. Бүгін сол сауалдардың жауабын Елбасының өз аузынан естіп білдік. Мәселен, Елбасының зейнетақы қаржысын бизнесті қаржыландыру үшін пайдалануды тоқтату керек,- деп айтқан ойын біз қолдаймыз. Өйткені әр адам болашақта зейнетақымен қамтамасыз етілуіне алаңдайтыны сөзсіз. Бұдан бөлек бюджет саласында еңбек ететін қызметкерлер жалақысы 2016 жылдың қаңтарынан бастап өсетінін естіп қуанып жатырмыз. Әрине, Жолдауда көптеген мәселелерге қатысты межелі бағыт-бағдарлар сараланып, салмақты таразыланған. Елбасы айтқандай, «Әлемдегі ең дамыған 30 мемлекеттің қатарына қосылып, бай да қуатты елдермен иық түйістіру – мақсатымыз» болса, Жолдауда көрсетілген жолмен жүретін болсақ, қазақ елінің басына туатын ондай күннің де алыс емес екенін аңғарғандаймыз. Сонда ғана тәуелсіздігімізді баянды етіп, мәңгілік ел – Қазақ елі болатынымыз айдан анық. Жолдаудағы: «Санаулы күндерден кейін біз азаттық туын желбіреткен Тәуелсіз мемлекет атанғанымыздың 25 жылдығына аяқ басамыз. Бұл - Тәуелсіздікті нығайту жолындағы өлшеусіз еңбегіміздің ширек ғасырлық белесін қорытындылайтын мерейлі сәт. Тәуелсіздікті баянды ету - оған қол жеткізуден де қиын екенін біз осы жылдар ішінде көріп-білдік. Мемлекетіміздің тұғырын мызғымастай нығайту үшін бізге әлі талай күрделі, өтпелі көп бұралаң жолдардан өтуге тура келеді.
Ең жақсы жоспар - заман талабына бейімделген жоспар. Біз де заманның беталысына қарай межелерімізді белгілеп, жоспарларымызды нақтылап отыруымыз қажет. Біздің мақсатымыз - елі бақытты, жері гүлденген, қасиетті Отанымыз - Қазақстанды мәңгілік ел ету», - деген Елбасы сөздері әр қазақстандықтың қаперінде жүрер ізгі сөздер деп ойлаймыз .
№25 жалпы білім беретін орта мектеп ұстаздары
