ХХІ ғасыр – білімділер ғасыры. Бізге ой-өрісі дамыған, талантты да дарынды, бәсекеге қабілетті ұрпақ тәрбиелеу керек. Білімді ұрпақ - болашағымыздың кепілі, егеменді еліміздің болашағы. Жас ұрпақтың тағдыры бүгінгі ұстаздардың қолында. Ұрпақ тәрбиесі – ұстазға байланысты. Ұлт ұстазы Ахмет Байтұрсынұлының: «Мектептің жаны – мұғалім. Мұғалім қандай болса, мектебі һәм сондай болмақшы» деген қанатты сөзі бар. Ал ХХІ ғасырдың ұстазы қандай болу керек?! Әрине, ол - өзгенің бақытын аялап, өзінің уақытын аямайтын, өз кәсібінің майталманы, осы мақсатқа рухани күш-жігерін, парасат-қуатын жұмсай білетін, жаңа технологияларды жетік меңгерген, жан-жақты дамыған жаңашыл тұлға болуы керек.
«Ұлт жоспары – Н.Ә.Назарбаевтың бес институционалдық реформасын жүзеге асырудың 100 қадамы» бағдарламасының 89 қадамында «Нұрлы болашақ» ұлттық жобасын әзірлеу және жүзеге асыру. Мектептік білім берудің қолданыстағы оқу бағдарламаларына Мәңгілік ел құндылықтарын енгізу туралы айтылған. Мәңгілік ел болуымыз үшін жан-жақты дамуымыз қажет. Дәл осы бағыт бойынша №64 негізгі орта мектепте 2015 жылы Назарбаев зияткерлік мектебі мен Кембридж университеті бірлесе құрған деңгейлік бағдарлама бойынша тоғыз айлық курстан өткен жоғары санатты физика пәнінің мұғалімі, мектеп директоры Күнеділов Нұрбол Дәріғұлұлының басшылығымен ғылыми-әдістемелік жұмысы басталған. Аталған мектепте бірнеше мұғалім білім беру саласында жасалған жаңа бағдарлама негізінде құрылған жаңа форматтағы үш айлық курсты сәтті аяқтап шықты. Осы мақалама арқау болып отырған сол курсты бітіріп шыққан ұстаздардың бірі №64 негізгі орта мектептің қазақ тілі мен әдебиеті пәнінің мұғалімі Мұрат Жұпар Мұратқызы. Ол жоғары білімді маман, І санатты ұстаз, әдістемелік бірлестіктің жетекшісі.
Жұпар Мұратқызы 2001 жылы Е.А.Бөкетов атындағы ҚарМУ-ға түсіп, 2004 жылы филология факультетін бітіріп шыққан. Аталған мектепте 2007 жылдан бері еңбек етіп келеді. 2013 жылы еліміздің білім беру жүйесіне енгізілген Кембридж университетінің бағдарламасы негізінде құрылған жаңа форматтағы үш айлық курсты тәмамдаған. Жұпар Мұратқызы өз пәнін жетік меңгерген сауатты, білікті маман, мемлекеттік тілді оқытуда қазіргі заманға сай әдіс-тәсілдерді, ақпараттық-коммуникативтік технологияны күнделікті сабағына жүйелі қолданатын жаңа форматты ұстаз. Өз ісіне ұқыпты, жинақы, үнемі ізденісте жүретін жасампаз тұлға. Әріптестерімен тәжірибе алмасу барысында жазған бірнеше мақалалары қалалық, облыстық, республикалық және халықаралық деңгейде жарық көрді. Жұпар Мұратқызының жетекшілігімен өзге ұлт өкілдерінің оқушылары мемлекеттік тілде ғылыми-зерттеушілік жобалар қорғап, қалалық және облыстық деңгейде жүлделі орындарға ие болып жүр. Қалалық семинарларда ашық сабақтар беріп, жаңа бағдарлама бойынша мұғалімдерге коучингтер, шеберлік сыныптар өткізіп, әріптестерімен тәжірибе алмасып, білімін үнемі шыңдап отырады. Осындай тынымсыз еңбегі, шығармашылық ізденісі мен жаңашылдығы үшін облыстық білім басқармасының, қалалық білім бөлімінің мақтау қағаздарымен және алғыс хатымен марапатталған.
«Жақсы мұғалім – мектептің жүрегі», - деп Ыбырай Алтынсарин айтқандай, мұғалім – мектептегі тіршіліктің қайнар бастауы. Елімнің болашағы деп үміттенетін бүгінгі жас ұрпаққа білім нәрін сеуіп, еңбексүйгіштік пен адамгершілікке тәрбиелеп, білімі мен өнегесін жас жеткіншектерге арнап, бойындағы бар күш-жігерін шәкірт тәрбиелеуге жұмсайтын Жұпар Мұратқызының еңбегі ерекше. Өз шәкірттері мен әріптестері арасында сыйлы да қарапайым, инабатты, салмақты, ізденуден де, үйренуден де бірде-бір жалықпайтын жаңашыл ұстаз. Сонымен қатар Жұпар Мұратқызы білімін үнемі жетілдіріп отыратын, жаңалыққа құштар жан-жақты ұстаз ғана емес, екі баланы тәрбиелеп отырған аяулы ана, асыл жар.
Тынбай еңбек етіп, үнемі ізденісте жүретін әріптесім Жұпар Мұратқызына шын жүректен зор денсаулық, отбасына амандық, болашағына толағай табыс, шығармашылық өрлеу тілеймін. Мұғалімдік – мәртебелі мамандық. Осы мәртебелі мамандық жолындағы еңбегің жана берсін. «Ұстаз бақыты – озып туған шәкірті» десе, атыңды айдай әлемге паш ететін білімді де талантты шәкірттерің көп болсын дегім келеді!
№64 негізгі орта мектеп мұғалімі
Жаукеева Гүлниет Тлегенқызы
Байланыс телефондары
