Мектебіміздің 8Ә сыныбының оқушылары суретші Кәріпбек Күйіковпен болған бенефис-шоуға қатысып келді. Суретшімен кездесу Облыстық Абай атындағы балалар кітапханасында өтті. Кәріпбек Күйіков Семей ядролық полигоны орналасқан жерден 100 шақырымдай жерде орналасқан Қарқаралы ауданына қарасты Егіндібұлақ ауылында туған. Полигон орналасқан жердегі зардаптарды, замана ащы шындығын көзбен көрген суретші туындыларында полигон зардаптарын салудан еш жалыққан емес. Туғанынан қолы жоқ болса да, қылқаламды тісімен немесе аяқтарының башпайының көмегімен серік еткен суретшінің туындыларына әлем елдері әлі күнге дейін таңырқап келеді. Кәріпбек Күйіков әлемді саяхаттап, адамдарға ядролық сынақтардың адамзат өміріне қандай әсер тигізетінін жиі айтып жүреді. Оның туындылары Германия, АҚШ және Жапонияның жеке коллекцияларында қойылған.