Парламенттік және конституциялық реформаларды талқылау Мемлекет басшысының 2025 жылғы 8 қыркүйекте Қазақстан халқына Жолдауында айтылған бастамасынан бастау алды. Осы үдеріс аясында парламенттік реформа жөніндегі Жұмыс тобы құрылып, e-Otinish және eGov платформалары арқылы азаматтар, сарапшылар, қоғамдық бірлестіктер мен саяси партиялардан жүздеген ұсыныстар, соның ішінде 1600-ден астам бастама түсті. Кері байланыстың тиімді тетіктерін пайдалану қоғамның әртүрлі пікірлері мен нақты сұраныстарын ескеруге мүмкіндік беріп, конституциялық реформаны жүргізу және Конституциялық комиссия құру туралы шешім қабылдауға негіз болды.