«Өлең – менің сәбиім»

Жүрегімнің тербететін әлдиін,

Өлең менің іштен шыққан сәбиім...

       Дәл осылай 2021 жылдың 11 ақпан күні мектебімізде «Жыр жалын» поэзия әлемі жобасының аясында Мұзбалақ ақын Мұқағали Мақатаевтың 90 жылдығына орай жерлес жас ақын, қоғам белсендісі Орынбаева Эльмира Сайлауқызының «Өлең – менің сәбиім» атты кездесу кеші басталған болатын. Осыдан 15 жыл бұрын Қарағанды шаһарында қайнаған қара өлеңнің ордасы болып табылатын Н.Гоголь атындағы әмбебап ғылыми кітапханасының жанындағы «Жыр-жауһар» поэзия клубы бастау алған болатын. Жаны қазақ жалынды жастар осы клубтың мүшесі атанып, қазақ поэзиясын өрін биіктеткен ақын жанды жастардың жаңа толқыны пайда болады. Бүгінгі күні Кеншілер мәдениет сарайы басшысының шығармашылық жөніндегі орынбасары, ақын, бүгінде бес бүлдіршінді тәрбиелеп отырған аяулы ана, кеш қонағы Эльмира Сайлауқызы – осы клубтың бастауында жүріп, өркендеуіне ерекше үлес қосқан жан.

    Мектебіміз «Жыр жалын» поэзия әлемі жобасына енгелі оқушыларымыз көптеген ақын-жазушылармен тікелей байланыс арқылы кездесіп, толғандырған сауалдарына жауап алып үлгерген еді. Бірақ, дәл бүгінгідей кеш әлі өткен жоқ. Әлем індеті аяқталмаса да, саябырсығаны бар. Сол себептен киелі сахна мен аяулы көрерменін сағынған оқушылар сахна төрінде өз өнерлерін көрсете жүріп, сарқылмас поэзиямен жұрттың шөлін қандырды. 11 Ә сынып оқушылары кештің басында Мұқағали мен Эльмираның өлеңдерін үйлестіре оқығанда, ақын қыздың көзіне еріксіз  ыстық жас келді. Сахна төрі поэзиямен ғана емес, әнмен, бимен ерекшеленді. 5 А,Ә сыныптарының оқушылары да кештің тамаша өтуіне себепші болды.