Мемлекеттік тіл – қазақ тілінің мәртебесі ерекше. Ол – қоғамды біріктіруші фактор, тәуелсіздігіміздің бір тірегі. Оны білу – әрбір қазақстандыққа парыз. Бүкіл еліміздегі бұл саясат жүзеге асырылып келеді. Тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру үшін арнайы облыстық іс-шаралар жоспары қабылданып, орындалуда. Мемлекеттік тіл мәселесі біздің жадымыздан ешқашан шықпақ емес.Қазақ тілі мемлекеттік тіл мәртебесін алып,бөркімізді аспанға лақтырып қуанғанымыз естеріңізде бар шығар?! Қазақша мектептер көбейіп,балабақшалар ашылды. Тіл жанашырлары мен қазақ зиялылары «Қазақ тілі қоғамының» ашылуына ат салысты, көптеген ономастика мәселелері шешілді, жарнамалар мен маңдайша тақтайларының дұрыс жазылуы қадағаланды. Студенттер мен оқушылардың арасында жарыстар, олимпиадалар, ойындар, байқаулар көптеп өткізіле бастады. Қуанышымызда шек болмады, жақында барлық саяси,ресми,бизнез және т.б. ұйымдар қазақ тілінде сайрайтын болады деп қуандық.Бірақ, біздің өңірдің қазақтары бұны үлкен мәселе деп ойламайтын болуы керек деген ойға қаламын. Бір масқарасы, басқа ұлт өкілі ортамызда болмаса да ана тілімізде сөйлемейміз, менсінбейміз. Өңірімізде мемлекеттік тілдің аясын кеңейту бағытында алғышарттар мен мақсаттар жеткілікті. Тек ынта мен жігер жетіспейді. Еш ұлтты да, ұлысты да бұған кінәлауға болмайды. Тек қана өзіміз кінәліміз. Мемлекеттік басқару жүйесі қазақшаланбай, елімізде мемлекеттік тіл дамымайды, қоғамдық қатынастарда үстемдік құрмайды. Сондықтан, мемлекеттік басқару жүйесіндегі азаматтар тіліміздің өз төрімізде мәңгілік салтанат құруы үшін бәріміз тек қана ана тілімізде сөйлеуіміз керек. Естеріңізде бар шығар, Кеңес заманында өмірінде бір ауыз орысша білмейтін жастар екі-үш айда сол тілде сайрап кеткенбіз. Сондықтан, мемлекет тарапынан талап болмайынша, сұраныс болмайды, сұраныс болмайынша нәтиже болмайды, ешқашан ешкімді қазақ тіліне үйрете алмаймыз. Кейбір үлкен мінбелерден қазақ тілі пәнінің сағатын көбейттік, бірақ нәтиже қайда деп сұрайды. Студент пен оқушы оқу орнын бітіре сала үйренгенін ұмытып жатыр. Сонда бұған кім кінәлі? Тіл – ұлттың тұғыры, мемлекетіміздің негізі. Тілі жоғалған мемлекет те жоғаларын ұмытпайық! Қазіргі кезде алдымызда тұрған үлкен мәселе латын графикасына көшу. Дүниежүзілік ақпаратта латын әліпбиінің oрны үлкeн. Сондықтан латын әліпбиінe көшу мәсeлесі кезек күттірмейтін міндет.