Бүгін жаратылыстану пәндері кафедрасының онкүндігі аясында физика пәнінің І деңгей мұғалімі Сатенова Ш.К. 10 «А» сыныбында «Изопроцестерге сапалық, мәтіндік, эксперименттік есептер шығару» тақырыбында практикалық сабақ өткізді. Сабақтың мақсаты есеп шығару барысында изопроцесс кезіндегі газ параметрлерінің бір-біріне тәуелділігіне көз жеткізу және осы тәуелділікті график түрінде сипаттай білу, графикпен жұмыс істеу ептіліктерін қалыптастыру, алған білімдерін өмірлік жағдаяттарда қолдана білуге дағдыландыру болды. Оқыту мен оқудағы жаңа әдіс-тәсілдерге негізделе жоспарланған сабақ өте қызықты өтті. Үй тапсырмасы «Tarsia» бағдарламасы бойынша дайындалған таратпалардың көмегімен тексерілді. Сабақ барысында ұсынылған «Газ заңдарын білесің бе?» тапсырмасында оқушылар сапалық есептер шығарса, «Графиктік жұмыста» газ күйінің диаграммасындағы түрлі ауысуларға сәйкес келетін процестерге талдау жасалды. «Эксперименттік жұмыс» тапсырмасында оқушылар «Жылу физикасы» атты виртуалды лабораториялық жұмыс бойынша изотермалық, изобаралық, изохоралық процестерді зерттеп, тұжырымдама жасаса, «Газ термометрі» тақырыбына PISA бағдарламасының негізінде құрылған мәтіндік тапсырмада оқушылардың функционалдық сауаттылығын дамытуға назар аударылды. Пәндік білімнің өмірмен байланысын жүзеге асыру мақсатында «Газ жарылысы» бейнефильмі көрсетіліп, газ жарылысын тудыратын себептер және оны болдырмау жолдары анықталды. Сабақта формативті бағалау, өзін-өзі бағалау және критериалды бағалау жүзеге асырылды. Сабақ соңында оқушылар сабақты қорытындылап, өздерінің білім деңгейлерін «Білім теңізі» әдісімен бағалады.