Интернат тәрбиешілерінің әдістемелік апталығының қорытындысы

2020-2021 оқу жылы  

Ұстаздың алғашқы міндеті – балаға тәрбие беру. Сондықтан да  әрдайым бірінші орында тәрбие тұрады. Өскелең жас ұрпақты тәрбиелеуде  тәрбиешілердің     алға қойған мақсаты: «Мәңгілік ел» идеясын бойына сіңірген, патриоттық рухы жоғары, өз ұлтының, халқының мәдени мұраларын игерген, Отанына деген сүйіспеншілігі мол, салауатты өмір салтын ұстанған тұлға тәрбиелеу. Осы мақсаттар бойынша оқушыларды тәрбиелеуде алдымызға мынадай  міндеттер қойдық.

    Міндеттері:

• тәрбиеленушілердің жеке басының даму ерекшеліктерін ескере отырып ,  олардың оқуға деген қызығушылықтарын арттыру;
• мәдени-гигиеналық, эстетикалық дағдыларын қалыптастыру, гигиеналық талаптарды сақтауға, ұқыптылыққа баулу;
• түрлі танымдық ойындар, қызықты шаралар  ұйымдастыру арқылы балалардың оқуға деген қызығушылықтарын арттыру,шығармашылықтарын дамыту;
• ата-аналармен, сынып жетекшілерімен  тығыз қарым-қатынаста болып, бала тәрбиесі жайында кеңес, дөңгелек үстелдер ұйымдастыру.

Алға қойған мақсат – міндеттерді жүзеге асыру үшін жыл басында тәрбиешілер  жылдық жоспар жасап, бекітті.  Осы  жоспар бойынша  әр топта тәрбие  жұмыстары жүргізіліп отырылады.

          Қазіргі таңда интернатта барлығы  103 оқушы (№11 Қыран тобы – 25 бала, №12 Қызғалдақ тобы – 20 бала, №13 Балауса тобы -30 бала, №14 Тұлпар – 28 бала)  тәлім-тәрбие алуда.

      Осы балаларға тәлім – тәрбие беруде  жоғары білімді 5 тәрбиеші жұмыс жасайды, олардың ішінде 4 тәрбиеші - жоғары  категориялы, 1 тәрбиеші –2 категориялы.

Оқу жылының басында  бірінші тоқсанды 109 бала аяқтаса,  екінші тоқсанда  106 оқушы,  үшінші тоқсанда  103 бала  аяқтады.

 І тоқсанның қорытындысы бойынша интернатта  5 оқу озаты,   39 оқу екпіндісі болса, ІІ тоқсанның қорытындысы бойынша   6 оқу озаты,   38 оқу екпіндісі болды.

ІІІ тоқсанда    5 оқу озаты,  44 оқу екпіндісі болды. Жалпы интернат оқушыларының оқу үлгерім мен тәрбие деңгейін салыстыратын болсақ:

І – тоқсанда   оқу үлгерімі –    40  %

                       тәрбие деңгейі-   72 %

ІI –тоқсанда   оқу үлгерімі  –   41%

                       тәрбие деңгейі-  77  %

ІIІ –тоқсанда   оқу үлгерімі  –   47 %

                       тәрбие деңгейі-   82% -ды құрап отыр.

Наурыз айының  15 - 19 наурыз аралығында «Ұрпақ тәрбиесі - ұлт болашағы»

интернат тәрбиешілерінің  апталығы өтті.

Мақсаты: Рухани жаңғыруды сипаттау, ұлттық құндылықтарды жаңғырту; Оқушылардың бойында ұлттық сананы ояту, туған халқына деген құрмет, сүйіспеншілік, мақтаныш сезімін ұялату, ұлттық рухты сіңіру.

Осы мақсатта  өткізілетін іс-шаралардың апталық  жоспары жасалып, бекітілді.

         Жоспар бойынша 15 наурыз  күні - «Ұлттық қолөнер - халқымыздың мұрасы» атты көрме ұйымдастырылды.  Бұл көрме жас ұрпақты қазақ халқының мол қолөнер үлгілерімен таныстыра отырып, халық өнерін қастерлеуге, үлгі тұтуға үйрету мақсатында өткізілді. Интернат залы Наурыз мерекесіне сай безендірілді, тақырыпқа сай буклеттер жасалынды. Көрмеге қазақтың ұлттық нақыштарын дәріптейтін қос ішекті домбыра, ұлттық киімдер. торсық, дорба,  құрақ көрпе, сандық, өрілген қамшы, т.б  түрлі бұйымдар қойылды. Сондай – ақ оқушылардың өз қолдарымен жасаған бұйымдары мен салған суреттері де қойылды.

16 наурыз  күні -  интернат оқушыларының   қатысуымен «Наурыз думан!» атты мерекелік шара өткізілді.  Іс-шараның мақсаты:оқушыларға Әз Наурыздың еңсесі биік елдіктің, іргесі сөгілмес бірліктің, ынтымақ пен ырыстың мерекесі екендігін сезіндіру, халқымыздың салт-дәстүрлерін дәріптеу арқылы оқушыларды еліне,жеріне деген сүйіспеншілікке, адамгершілікке тәрбиелеу және қазақ халқының шығармашылық дәстүрлері, ауыз әдебиетінің мұраларымен таныстырып, олардың тарихи маңызын түсіндіру. Шараға қатысушы оқушылар өз  өнерлерімен көрермендерді разы қылды. Оқушыларымыз бірі өлең айтып, домбыра тартса, бірі жырдан шашу шашып, өз өнерлерін көрсете білді.

17 наурыз  күні - тәрбиеші Рахимжанова А.Х. оқушылармен «Салт-дәстүрді  білеміз бе?» тақырыбында сұрақ-жауап өткізді. Оқушыларға сұрақтар салт-дәстүрлер мен ырым-тиымдарға байланысты қойылды, оқушылар өте сауатты, ізденіп жауап беріп, өз ойларын жүйелеп айта білді.  Сонымен бірге  оқушылар ұлттық салт-дәстүр туралы білімдері жұмбақтар шешуде, мақал – мәтелдердің жалғасын табуда қызығушылықтарын  көрсете отырып, шапшаңдық таныта білді. Өткізілген шарадан әр оқушы  қазақ халқының әрбір тұжырымды ойы, салт- дәстүрі, мақал - мәтелі, тыйым сөздері - тәрбиенің мол мұрасы екендігін, оның күнделікті өмірде қажеттілігін көріп сезінді, бойларына сіңіре білді деген  ойдамыз.

18 наурыз  күні - «Ұлттық ойын – халық мұрасы» тақырыбында ұлттық ойындардан спорттық жарыстар өткізілді. Өткізген шараның мақсаты:  халқымыздың аса құнды мәдени игіліктерінің бірі-ұлттық ойындар жөнінде білімдерін дамыту; ойын әдісін пайдалану арқылы ұлттық сана – сезімін, өз  білімдерін шынайы өмірде толық қолдана алатын жеке тұлға қалыптастыру, ұлттық ойындар арқылы белсенділікке, тапқырлыққа, дәлдікке және денсаулығын шыңдай түсуге тәрбиелеу. Оқушылармен осындай аса құнды мәдени игіліктердің бірі - ұлт ойындарды өткізу барысында, олардың  дене күш-қуатын молайтып, оны шапшаңдыққа, дәлдікке, икемділікке т.б. тәрбиелеп қана қоймай, олардың ақыл - ойының толысуына, есейіп өсуіне де көп пайдасын тигізді деген ойдамыз. Сондай – ақ оқушыларға  ұлттық ойындар туралы сұрақтар қойылып оқушылардан жауаптар алынып, ұлттық ойындар  жөнінде мақал-мәтелдерде айтылды. Оқушылар түрлі асық ойындарын, «Ханталапай», «Арқан тарту», «Тоғызқұмалақ», «Орамал тастау», Қолкүрес» т.б ойын түрлерін ойнап, күш сынасты.

19 наурыз күні -  психолог маманының қатысуымен «Отбасы құндылықтары және ұлттық тәрбие» тақырыбында ZOOM арқылы  ата-аналармен дөңгелек үстел өткізілді. Дөңгелек үстел өткізудегі мақсатымыз  қазіргі заманның ағымына байланысты отбасы құндылықтарын қалыптастыра отырып, ата-ананың бала тәрбиесіндегі әлеуметтік міндеттері мен отбасылық мәселелердің маңыздылығын айқындап, жауапкершіліктерін арттыру. ZOOM арқылы  өткізілген дөңгелек үстелге  25 ата-ана қатысты. Дөңгелек үстелде отбасы құндылығы туралы, ата-ана және бала қарым-қатынасын өзара байланысын қалыптастыру, отбасының киелі қасиетке ие болу сыры, отбасы тәлімінің мәні туралы сөз қозғалды. Апталықта жоспарланған шаралар  өз уақытында өткізілді.  Апталық барысында тәрбиешілер  оқушыларға тиімді шаралар өткізуге тырысты, өткізілген шараларға барлық топ тәрбиешілер жан-жақты ізденіп,  дайындықпен қатысты.