20 Наурыз №68 Мектеп-интернат-бала бақша кешенінде ұлыстың ұлы күні өтті. Ата-бабамыздың сөзімен айтсақ, ақ түйенің қарны жарылған күн. Наурыз мейрамы. Наурыз салтанаты! Осы бір қасиетті сөздің мәніне үңілер болсақ; «Жаңа күн» деген ұғымды білдіреді. Ендеше Наурыз – жыл басы, жаңа күннің, жаңа жылдың төл басы. Бұл біздің халқымызда күн мен түннің теңелер мезгіліне сәйкес келеді екен. Бұл шақ – қыс бойғы қар көбесі сөгіліп, тіршілік атаулыға жан бітер шақ. Мал бағуды кәсіп еткен аталарымыздың аузы аққа, ерні көкке тиер, арқа басы кеңіп, мәз-мейрам шаттыққа бөленер шағы.

Көктем ана жазылып алақаны,

Бусанғандай бүгін бір дала таңы,

Нәркес көзін төңкеріп ару қыздай,

Наурызым тұр аймалап Сарыарқаны.

Бұл күні аталарымыз бен әжелеріміз үй-үйді аралап, наурыз көжеден дәм тататын. Үлкендер кішілерге ақ баталарын беріп, ізгі тілек тілесетін. «Ұлыс күні қазан толса, ол жылы ақ мол болар», «Үлкен кісіден бата алса, сонда олжалы жол болар», - деп нақыл айтып, ел арасын бірлікке, татулыққа шақыратын. Жыл басы- Наурыз күнгі бұл тілектер міндетті түрде қабыл болады деп ырым ететін.

Ғасырлар бойы атадан балаға мұра болып келе жатқан дәстүрлі наурыз бүгін міне, есігімізді ашып отыр. Біздің өткен жылға еш өкпеміз жоқ. Ендеше, халқым бастайық тойды, жаңа күннің, жаңа жылдың жаңа тойын бастайық!

Ұлыс келді!

Ұлыспенен жеріме тыныс келді,

Ақ боз аттың уығы күмістелді.

Торғай біткен топырлап шұқынып жүр,

Бітіре алмай жүргендей бір істерді.

Ауылымыздың бар жасы игі іс бастап

Бұлақ көзін ашқанды дұрыс көрді.

Олар еккен жас ағаш жайқалғанда,

Жібергендей билетіп алып жерді.

Қазақ халқы «Табиғат-тал бесігім» деп аялап қараған, мейірман халық. Табиғаттың әр тасын қастерлеп, суын-балға балап, жерін Анам деп есептеген. Сондықтан болар, «Судың да сұрауы бар», «Бір тал кессең, он тал ек» деген нақыл сөздерді ұрпағына үйретіп кеткені.