2012 жылдың 19 қыркүйегінде  Махамбеттің туған жері Атырау қаласында өткен ІІІ республикалық Махамбет оқуларында Қарағанды қаласы №61ЖББОМ-тің 8 «А» сынып оқушысы Кенжебаева Айнұр «Ел құтқарар ер едім»номинациясы бойынша Бас жүлдеге ие болды. Айнұрға Бас жүлдеге түрлі-түсті плазмалық теледидар сыйлыққа тартылды. Айнұрдың ұстазы – мектептің қазақ тілі мен әдебиеті пәні мұғалімі – Торекелдина Дидар Қарсыбаевна. Айнұрдың айтуынша, көктемде облыстық кезеңде жүлделі орынды иеленіп, Атырауға баратыны белгілі болғаннан кейін, ұстазы шәкіртінің бәйгеден озуына көп еңбек сіңірген. Олар Махамбеттің 251 өлеңін жаттаған. Ұстаз Айнұрмен қалаға келісімен  8 «Ә» сынып оқушысы Оразов Күмісбекпен Талдықорған қаласында қыркүйек айының 26 жұлдызында өткен біртуар жазушы Оралхан Бөкейдің шығармашылығына арналған республикалық дәстүрлі байқауға аттанды. Күмісбек 30-жасқа дейінгі ересектерге арналған сайысқа қатысып, «Алғыс хатпен» және бағалы сыйлықпен марапатталды.

Мектепте қазақ сыныптарының ашылған мерзіміне көп болмағанын ескерсек, бұл жеңіс – мектеп ұжымы үшін үлкен мәртебе.