Ата-аналар назарына!

 

Қарағанды қаласы Білім басқармасының «№ 91 жалпы білім беретін мектебі» КММ әкімшілігі 2025–2026 оқу жылының аяқталуына орай, соңғы қоңырау және қорытынды аттестаттау кезеңінде, соның ішінде 4, 9, 11-сынып бітірушілерге қатысты келесі маңызды ақпараттарды назарларыңызға ұсынады.

 

Педагогикалық әдептілік пен сыбайлас жемқорлықтың алдын алу мақсатында мұғалімдерге қандай да бір сыйлық жасауға немесе ата-аналар тарапынан қаражат жинауға қатаң түрде тыйым салынатынын ескертеміз.

Сондай-ақ, мерекелік шараларға аниматорлар, түрлі студиялар мен агенттіктерді тартуға жол берілмейді. Мектептің ішкі қажеттіліктеріне, соның ішінде жөндеу немесе санитарлық-шаруашылық заттарды сатып алу үшін білім алушылардан қаражат жинауға да қатаң тыйым салынады.

Оқушылардың қауіпсіздігін қамтамасыз ету мақсатында автокөлік шерулерін ұйымдастыруға, ойын-сауық орталықтарына, мейрамханаларға, дәмханаларға және басқа да қоғамдық орындарға баруға рұқсат етілмейді. Сонымен қатар, мектеп аумағында немесе одан тыс жерлерде ата-аналар тарапынан мерекелік дастархан ұйымдастыруға және қаржы жинауға болмайды.

Қорытынды аттестаттау кезеңінде әрбір оқушы мектеп формасын сақтап, тәртіп пен жауапкершілікті жоғары деңгейде ұстануы қажет екенін ерекше атап өтеміз.

 

Ескерту:

Аталған талаптар 4, 9,11 сынып оқушылары мен олардың ата-аналары үшін бірдей міндетті болып табылады. Бұл шаралар білім беру үдерісінде әділдік пен ашықтықты қамтамасыз етуге, сондай-ақ сыбайлас жемқорлықтың алдын алуға бағытталған.

 

Құрметті ата-аналар!

Сіздерді жоғарыда көрсетілген талаптарды түсіністікпен қабылдап, қатаң сақтауға шақырамыз. Балаларыңыздың қауіпсіздігі мен жарқын болашағы – біздің ортақ жауапкершілігіміз. Біз үшін сапалы білім мен саналы тәрбие беру – абыройлы міндет.