Қарағанды облысы Білім басқармасы білім беру мекемелеріндегі педагогтер арасында Абай Құнанбайұлының 170 жылдығына арналған

облыстық сынып сағаттар байқауына арналған

 «Білімді сол кісіден ізденелік!»

атты сынып сағатының өткізілуі туралы ақпарат.

 

Заманымыздың заңғар жазушысы, ғасыр ғұламасы атанған М.Әуезовтің «Халық пен халықты, адам мен адамды теңестіретін нәрсе-білім» деген сөзінің маңызы ешқашан жойылмақ емес, себебі кез келген мемлекеттің мәдениеті дамуының деңгейін, рухани мазмұнын, интеллектуалдық қуатын, өркендеу әлеуетін айқындайтын бірден бір көрсеткіш-білім берудегі жүйелілік пен сапалылық.

         Отандық білім беру жүйесінің алдында білім сапасының бәсекелестігін арттыру, оқушыларды шынайы өмірге бейімдеу мәселелері тұр. Сол мақсатта Қарағанды облысы Білім басқармасы білім беру мекемесі педагогтер арасында Абай Құнанбайұлының 170 жылдығына арналған облыстық сынып сағаттар байқауын өткізу туралы ереже шығарған болатын.

         №10 ЖББОМ ұжымы бұл ұсынысты қызу қолдап, 1-кезең бойынша 04-27 ақпан аралығында Айтмағанбетова Тазагүл Бархатқызы 10 «А» сыныбында  «Абай және ән өнері», Аширбекова Айжан Аукешқызы 8 «Б» сыныбында «Абай-ағартушы», Маймұрынова Құралай Ақжолқызы 4«Б» сыныбында «Абай Құнанбайұлының өмірі мен шығармашылығы», Жунусова Нұргүл Зейнуллақызы 7 «Б» сыныбында «Абай Құнанбайұлының шығармашылық мұрасы», Ақмағамбетова Бағлан Мәжитқызы 5«А» сыныбында «Білімді сол кісіден ізденелік!», Сыздықова Гүлден Ортауқызы 9 «А» сыныбында «Абайдың қарасөздері» атты сынып сағаттарын өткізді. Әдістемелік бірлестіктің жиналысы шешімімен 5 «А» сыныбында өткен «Білімді сол кісіден ізденелік!» атты сынып сағаты әзірлемесін 2-кезең, яғни 03-13 наурыз аралығында өтетін аудандық (қалалық) деңгейге жолдадық.

         Сайыс мәресі шеберлік сабақ өткізу болатын. Шеберлік сабақ 2015 жылдың 04 наурыз күні сағат 8.50-де №10 ЖББОМ 205 кабинетінде өтті. Сынып сағаты  барысы өте тартымды, жеңілден күрделіге қарай бағыттау арқылы баланың өз бетімен жұмыс жүргізіп, ойын жүйелеуіне, айтар сөзінің орындылығы мен көркемдігіне көңіл бөліп, білімді шығармашылық меңгеру дағдыларына тәрбиелеуге, ережеде көрсетілгендей өскелең ұрпақтың дүниетанымы мен жеке тұлғалық өсуін қалыптастыруға бағытталды.

         Сынып сағаты өтпестен бұрын  оқушылармен Абай ата ескерткішіне  гүл шоқтары қойылды және мектептің кітапханасына саяхат жасалды.

            Кабинет Абай портреті, шармен безендірілді және оқушылар кеудесінде Абай суреті бар медальондар болды.  Сабақтың көрнекілігіне интерактивті тақта, бейнетаспа, фотосуреттер, аудиодыбыс желісі қолданылды.

         Интерактивті тақтаға Шәкәрім Құдайбердіұлының «Жастарға» өлеңінің екі шумағы жазылып, ол аудиодыбыстан дыбысталды.

         Бейнетаспадан Абай ескерткішіне барғанда түскен фотосуреттер көрсетілді  және мектеп кітапханасының  кітапханашысы Ахметова Бекен Сағынбекқызының интервьюі тыңдалды.

         Оқушының өзін көбірек сөйлету, оқушыға бағыт беру, яғни түрткі сұрақ, реплика беру мақсатында сұрақтар берілді.

1.     Абай ескерткішіне барғанда қандай сезімде болдың?

2.     Мектеп кітапханасы саған не берді?

Мәуленберген Зере:

1.     Абайдың мүсініне барып, гүл қойғанда, Абайдың бүкіл өмірбаяны өн бойымнан өткендей болды. Оның бізге қалдырған асыл мұрасы бір күш арқылы маған еніп жатқандай күй кештім.

2.     Мектеп кітапханасына бұрын-соңды бармаппын. Абай шығармаларымен таныстым.

Маратов Айсұлтан:

1.     Мен Абай атаның ескерткішіне барғанда, ол менің басымнан сипап, «Оқы, оқы» деп тұрғандай болды. Ал, гүл шоғын қойғанда менің дәл жанымда тұрып ақыл берді. Мен өзгеремін.

2.     Мен де кітапханаға барып жүргеніммен кітап алып көрген жоқ едім. Сапарғали Бегалиннің «Шоқан асулары» кітабын жаздырып алып, оқып жатырмын. Үй тапсырмасы сол болатын.

Қажыбек Тоқтар:

1.     Абай атамның ескерткішіне барып гүл қояйын деп жатқанда Абай атам маған білімін бергендей болды. Мен Абай атам сияқты болғым келеді.

2.     Мен кітапханадан кітап алып жүретінмін. Бірақ Абай туралы шығармаларға мән бермеген болатынмын. Келешекте алыстан іздемейтін болдым. Қуаныштымын.

Жеңіс Ақерке:

1.     Абай ата ескерткішіне жақындағанда бір жылулық сездім. Мен сол кезде түсіндім, ақын сондай мейірімді, кішіпейіл, адамдарға жақсылық тілеп, олардың мәдениетті болғанын қалағанын. Күлімдеп тұрғандай.

2.     Біздің кітапханадағы «Абай елі»  кітабы маған қатты ұнады. Үш тілде жазылған. Суреттері де әдемі екен. Әр шығармаға байланысты түсіндірмесі бар. Парақтай бергім келді деп жауап берді.

Білімді шығармашылықпен меңгеруге дағдыландыру және оқу проблемасын шешу шеберлігіне тәрбиелеу мақсатында  «Математикалық бағыт» ойыны ойналды. Оқушылар ептеп қиналды, шатасты, нәтижесінде дұрыс жауаптар алынды.

Биыл қазақ хандығына неше жыл толды?

50+ 20 х 25 = 550

Қазақстан Халықтар Ассамблеясы қай жылы құрылды?

1000+995  = 1995

Биыл мамыр айында Ұлы Отан соғысы Жеңісіне неше жыл толады?

5х5+45 = 70

Абай Құнанбаевтың туған жылы?

1005+840 = 1845

Абай Құнанбаевтың қайтыс болған жылы?

1004+900 = 1904

Абайдың қанша қара сөзі бар?

5х9 = 45

Абай неше жасында оқудан оралады?

5+2х4 = 13

         Мәтін тақырыбын түсіну, ашу, ондағы негізгі ойды бөліп алу, өз пікірін тұжырымдау, өз ойын дұрыс айту  мақсатында  Абай туралы ақпарат мәтіні таратылып, мақсатта көрсетілгендей сабаққа белсене қатыспайтын оқушыларға топтың жәрдемдесуі сұралды. Бірінші топтан Айдос, екінші топтан Нұрсұлтан жауап беретінін ескертіп, оқушылардан сол балаларды дайындауы өтінілді.

«Ыстық орындық» ойынына қатысушыларға топтың намысын қорғайтынын ескертіп, «топтың  жеңіске жетуі сендердің қолдарыңда» дегендей жігерлендіру берілді. Айдосқа төмендегі сұрақтар қойылды.

Қойылған сұрақтар	Жауабы
Абай ауырғанда көңілін көтерген ақындар кімдер?	Ойланды, жауап берді
Абай кім?	Жауап берді
Абайдың туыстарынан кімді білесің?	Толық емес
Абайдың қандай поэмаларын білесің?	Мүдірді
«Абай жолы» романын жазған жазушы кім?	Мүдірмей жауап берді

 

 Нұрсұлтан қойылған сұрақтарға жақсы жауап беріп, тобына  Қазақстан Республикасы туымен оралып, топты қуанышқа бөледі.

Оқушыға материалды меңгертуде, оның интеллектуалдық танымын кеңейту барысында оқушылардың деңгейіне арнап шығарған өлең  жолдарды

Мұғалім.

Абайды үйрен асықпай,

Қан қалғанша қасықтай.

Бәрін жаттап алыңдар

Иіріңдер асықтай.

Дәурен.
Маңдайдағы дарынды адам

Дүниеге бой алдырмаған.

Абай неге сөнеді?!
Ақын жаны кең еді,
Ойлағаны елі еді.

 

 

Айғаным.

«Халқым, жұртым» дегенде
Қабырғасы сөгілді.

Келешектің қамымен

Сонша тері төгілді.

Дара ақын ер еді,
Жүрген жері төр еді.

Дильназ

170 жыл аты өлмеген,

Абай атама таң қалам.

Абайдан үлгі алмаған,

Жер бетінде бар ма адам?!

Абай жыры мәңгілік, 
Жүрегім оны сезеді.
Жазира, дархан бел еді,-деп оқушылар мәнерлеп оқып берді .

Соңында мақтанышпен  бәрі:

  Абай-ұлы, дана, дара, жақсы адам,

Абайдың ұрпағы болғаныма мақтанам!

Абай мәңгі жүректе!,-деп кеуделеріндегі Абай бейнесін көрсетті.

Сынып сағаты Абайдың «Желсіз түнде жарық ай» әнін орындаумен аяқталды.

Сынып сағатына қатысқан оқытушылардың сабақты талдауы.

 

Оқу-әдістемелік орталығы өкілі:

-         Маған сынып сағаты қатты ұнады. Оқытушы 20 минут аясында қаншама материалдарды еш қиналмай, оңай жеткізе білді. Оқушылар да өте алғыр екен. Бекітілген тақырыптар бойынша ұсынылған шығармашылық материалдар формасы мен сынып сағаты мазмұны сәйкес келді. Тақырып ашылды. Мен авторлық шешімге   оқытушының құрастырған өлең жолдарын жатқызар едім.  Ескерткішке бару, саяхатқа шығу, одан өз көргендерін түю-стандарттық емес идеялар. Оқытушы ақпараттық технологияларды молынан пайдаланып, кәсібиліктің, білімдарлықтың, білгірліктің, құзыреттіліктің жоғары деңгейін таныта алды. Сізге үлкен рахмет!

№10 ЖББОМ директоры Нуркишева Тлеухор Тоқтаровна:

-         Сынып сағаты алдына қойған мақсатына жетті. Оқытушы шеберлігі, жан-жақтылығы, материалдардың байлығы мені тәнті етті. Оқушылар берілген тапсырмалардың күрделілігіне қарамастан меңгерген.

Аширбекова Айжан Аукешовна:

-         Балалар, бүгінгідей сабақ көрсеткендерің үшін сендердің ұстаздарыңа және сендерге үлкен алғысымды білдіремін. Тек оқушылар Сіздерге айтарым: сабырлықты ұмытып кетіп жатасыңдар. Әрине, кім болсын білгенін елден бұрын жеткізгісі келеді, бірақ тәртіп деген болады ғой. Келешекте шуламай, бір-біріңді тыңдап, сабырмен жауап беруге, әсіресе, Ақерке тырысқан жөн. Аз ғана уақыт ішінде дайындаған сынып сағаттарың өте жоғары деңгейде өтті деп айта аламын.

Маймұрынова Құралай Ақжоловна:

-         Сабақ маған өте ұнады. Материалдар өте ауқымды. Мен бұл материалдарды 8-9 сынып оқушылары меңгеруі тиіс деп айта аламын. Еңбектеріңізге табыс, әрқашан жетістікте болуларыңызды тілеймін.

Мусаева Меруерт Жанасовна:

-         Маған сынып сағаты ұнады. Өзіме көп тағлым алдым. Оқушылар өздігінен жұмыс жасады. Көп рахмет айтамын.

Ильясова Меруерт Оңғарбаевна:

-         Мен де Айжан Аукешовнаның пікіріне толық қосыламын. Өзім көп нәрсені үйрендім. Келешекте сабағыма қолдануға жолдама алдым.

Мақсұтова Бұлбұл Бейбітовна:

-         Мен оқуда жүрген аралықта сабақ беретін 5 «А» сыныбы Сіздей ұзтаздан тәлім алғанына қуанып тұрмын. Рахмет айтамын.