Мектебімізде қазақ тілі мен әдебиеті пәнінің апталығы аясында жыр дүлдүлі, ақиық ақын Мұқағали Мақатаевтың 85 жылдық мерейтойына арналған «Мұқағали – мәңгілік ғұмыр» атты әдеби-сазды кеш өтті. Кешті ұйымдастырушылар қазақ тілі мен әдебиеті пәнінің мұғалімі Төлешева Райхан Қайыпқызы мен тарих пәнінің мұғалімі Агадилова Эльмира Амантаевна. Кеш өте мазмұнды өтті. Мұқағали өмірінен естеліктер айтылды, өлеңдері оқылды, әндері орындалды. Мектеп ұстазы Тажина Шолпан ҚойшыбекқызыныңМұқағали ауылына барғаны, ақынның туған жері туралы әсерін баяндай отырып, Мұқағали өлеңін жатқа оқып беруі оқушылар үшін бір өнеге деп айтуға болады. Мұқағали жырларын мәнерлеп жатқа оқыған оқушылар: Егубаева Динара, Ташетова Назерке, Сансызбай Асылтас, Абильдинова Назерке, Аймерей Сара, Ниязова Венера, Қаниева Назина, Берликбаева Аида, Амантаева Майя. Ақынның «Райымбек» поэмасынан көрсетілген үзіндідегі батырдың рөлін сомдаған оқушы Хайдаров Жайдарға ерекше ықылас білдіруге болады. «Менің анкетам» өлеңі арқылы ақын өмірінен мәлімет берген оқушылар Аманкелді Қаныш пен Рахманов Әлішерге де көпшілік ерекше құрмет көрсетті. Кеш барысында ақынның әндері, ақын сөзіне жазылған басқа да сазгерлердің әндерін әуелете шырқап, көптің көңілінен шыққан мектеп ұстаздары Агадилова Эльмира Амантаевна мен Жұмажанов Дархан, Гуманитарлық колледж студенті Ғалымбек Гүлмарал, 10-сынып оқушысы Төлеген Әлібек. Күмбірлете тартылған күй мен мың бұрала билеген бишілер де кештің сәнін келтіре түсті.Кешті жүргізген Мадалеева Айерке мен Жаркен Алдияр да өздерінің жүргізушілік қабілеттерін көрсете білді.

Жылдар өтер...  Әлі небір ақындар дүниеге келер. Бірақ қара өлең құдіретін аспанға көтерген Мұқағали есімі қашанда биіктен көрінер. Мұқағали поэзиясы әрбір мезгілмен бірге, әр ұрпақпен бірге.Оқушылар кеш бойынша осындай ой түйген болар.