Елбасы Н.Ә.Назарбаев өзінің бір жолдауында «Тілдердің үш тұғырлығы» мәдени жобасын іске асыруға ерекше мән берген болатын. “Мәдени мұра” мемлекеттік бағдарламасында мемлекеттік тілде әлемдік ғылыми ойдың, мәдениет пен әдебиеттің үздік жетістіктерінің толымды қорын жасау міндетін айқындап берді. Тілдердің үш тұғырлығының бір қанаты -  біздің ана тіліміз.  Бүгінгі таңда қазақ тілін оқытудың сапасын арттыру, тілдің қадір-қасиетін ұғындыруқажеттілігіне ерекше назар аударылуда. Осы мақсатпен қалалық оқу бөлімінің қазақ тілі мен әдебиеті әдістемелік бөлімінің жетекшісі Г.Б.Жаркееваның ұйымдастыруымен қазақ тілі мен әдебиеті пәні мұғалімдерінің ҚарМУ оқытушыларымен біріккен «Қазақ тілін оқытудағы кейбір мәселелер» тақырыбында тағылымы мол семинар өткізілді.  Қазақ тілін тереңдетіп оқыту - бүгінгі таңдағы орта білім жүйесінде педагогикалық үрдістің негізгі бағыттарының,  ҰБТ – білім сапасының негізгі көрсеткіші. Пән мұғалімдерінің мектеп бағдарламасындағы, 12 жылдық білім беру жүйесіндегі, оқушыларды ҰБТ-ға дайындау барысындағы тіл білімінің кейбір мәселелері бойынша көкейде жүрген сұрақтары бойынша пікірталастар ұйымдастырылды.  «Сөзжасам мәселелері» бойынша филология ғылымдарының кандидаты, доцент Пірімбетов Т.Т.,  «Фонетика мен орфография» мәселесі бойынша филология ғылымдарының кандидаты, доцент Қалиев Б.А., «Синтаксис» мәселесі бойынша Нагашытаева З.Н. тың мәліметтермен оқытушыларды таныстырып, тұжырымды ойларын ортаға салды. ҰБТ-ға дайындаудың тиімді бір жолы ретінде Жалпы білім беретін №77 мектеп-балабақша кешенінің қазақ тілі мен әдебиеті пәнінің жоғары санатты ұстазы Төлешева Р.Қ. «Синтаксис» тарауы бойынша «Құрмалас сөйлемді оқыту жолдары» тақырыбында шеберлік сыныбын өткізді. 

Семинар соңында филология ғылымдарының докторы, профессор Мажитаева Ш.М. мектеп мұғалімдерімен осындай тағылымы мол семинарды жиі ұйымдастыру керектігіне тоқтала отырып, мұғалімдермен бірге мақалалар жазу, оқулықтар құрасатыру, жобалар қорғау сияқты жұмыстарды алдағы уақытта жүзеге асыру керек деген пікірін білдірді.

«Елдің ертеңі – бүгінгі жас ұрпақтың қолында, ал жас ұрпақтың тағдыры – ұстаздың қолында» дейді Н.Ә. Назарбаев. Ендеше жас ұрпақтың қазақ тіліне деген сүйіспеншілігін, қызығушылықтары мен талпыныстарын арттыру арқылы олардың Отанға деген махаббаттарын оятып, өз тағдырын ел тағдырымен мәңгілікке байланыстыратын ұрпақ болып қалыптасуына қол жеткізу - басты міндетіміз.