Тегінде  ата бабамыз мейірімі мен шапағатқа толы аяулы жандарды көрсе «Көсегең көгерсін, Аллаһтың нұры жаусын!», деп ыстық ықыласын тілегі бір тілеулес ағайынға айтып жататындай көрінеді маған. Атамыз қазақ ежелден дәстүрінің қымбатын, әдет ғұрпының сымбатын сақтаған, «Жетімі мен жесірін» жетімсіретпеген дана халық. Тағдыры толғанысқа толы болған кешегі халқымыздың бүгінде берекесі мен мерекесі қазанында қайнаған тәуелсіз ел. Қуанамыз. Шүкірлік етеміз. «Жасасаң қайыр қарыз деп айтпа қарағым» деп ақиық Алаштың ақыны Мұқағали жырлағандай бүгінде дәстүрлі республикалық «Мектепке жол» акциясы қатарынан жылдарды артқа тастап, беделді айрықша орын алған бағдарлама санатында және еліміздегі ерекше қорғаудағы балалардың әлеуметтік жағдайын жақсартуға мол ықпал етеді.  Бұл игі іс шара «Мектепке жол» акциясы біздің №68 мектеп-интернат балабақша кешенінде де  дәстүрлі түрде өз жалғасын тапты. Мұқтаров Жәнділ Ауханұлы басқарып отырған кешен ұжымы мемлекеттік және мектептегі қамқорлық іс шараларына белсене қатысып, жасаған қамқорлық пен өлшеусіз үлестерін «таудай ғып» айтар «екінші ата-анаң - ұстазың» деген атқа әбден лайық ұстаздарға толы. Міне, бүгінде осы игі іс шараның ұйытқысы бола білген мектеп ұстаздары және осы шараға белсене қатысқан кешеннің әлеуметтік серіктестігі Қарағанды Мемлекеттік Медицина университетінің Жастар саясаты бөлімінің меңгерущісі Доскожин Дулат Мұқажанович және университет ұжымы жыл сайын біздің оқушыларымызға қамқорлық көрсетіп келеді. Биылғы  2012-2013 оқу жылында да бұл акцияға белсене қатысты. Сонымен қатар  ТОО  «Ұлар» МК директоры Ташмағанбетов Кайрат Кеңесханович басшылығымен кешен оқушыларына жаңа оқу жылына мектеп формасы, спорттық киім, мектеп сөмкесі т.б. оқу құралдарымен ризашылыққа бөлеп, өз қамқорлықтарын көрсетті. Бұл игі іс шара көп балалы, қамқорлықтағы балалар, ата-анасының біреуінен айырылған, жалғызбасты ана тәрбиесіндегі отбасы балаларын қамтыды. Қанатын жайған қамқорлық іс шарасына №68 мектеп интернат кешен ұжымы және ұстаздар қауымы өз демеушілеріне ризашылық алғыстарын білдіріп, мұндай игі іс шаралар тағы да өз жалғасын табады деген ниеттеміз.

№68 мектеп-интернат-балабақша кешенінің әлеуметтік педагогі

Айтбай Гүлмира Бекенқызы