Жыл сайын Елбасының 2003ж. 15 қараша күнгі Жарлығына сәйкес тамыз айының үшінші жексенбісінде өтетін Қазақстан Республикасының Спорт күні биыл 16 тамызға сәйкес келді. ЖОББ №53 мектеп-лицейде бұл күн салауатты өмір салтын, спортты насихаттаған спорттық шараларға толы күн болды. Кортта өткізілген жалпы жиыннан кейін жиналған көпшілік сазды гимнастика жасады. Содан соң барлық қатысушылар жүгіруден «Президенттік миля» жарысына атсалысты. Бұл күннің ең тартымды шарасы бастауыш сынып мұғалімдері ұйымдастырған «Толағай» отбасылық спорттық сайыс болды. 3-5 сыныптардың оқушылары мен ата-аналары қатысқан бұл сайыс қызықты өтті. Одан өзге командалық волейбол, баскетбол, футбол ойындары да тартымды өтті. Бастауыш сыныптарының енді бір тобы «Көңілді старттар» ойынына белсене қатысты. Ұлттық «Тоғызқұмалақ» ойынына қатысу үшін үстел жанында кезектерін асыға күтіп тұрған оқушылар қарасы көз қуантады. «Дойбы» ойнауды да меңгерген оқушылар баршылық екен. Спорт күніне мектеп-лицейдің барлық ұстаздары, көптеген ата-аналар мен оқушылар белсене қатысты. Бұл орайда дене тәрбиесі пәні мұғалімдері мен сынып жетекшілері тамаша белсенділік көрсете білді.