19-ы күнгі оқушылардың Наурыз мерекесі таңғы жиындағы шаттық шеңберінен басталды. Онда мектеп театр студиясының мүшелері «Наурыздың келуі» атты қойылым көрсетті. Әр сынып өз кабинеттерін түрлі атаумен ауыл етіп безендіріп, өнер көрсетті. Ата-аналары дайындап әкелген Наурыз-көжеден дәм татып, ұлттық дәстүр, ұғымдар жөнінде әңгімелер естіді, ән айтып, би биледі. Әнші, биші, күйші балалар «ауылдарындағы» мерекенің қызықты өтуіне белсене атсалысты.

     Мектептің өнерлі ұстаздары да мереке  қызығын арттыра түсті. Өнерлі ұстаздар көп айтыла бермейтін салттың бірі – «Өңір салуды» көрсетті. Домбырамен әсем әнді әуелеткен ұстаздар енді бірде «Қара жорға» биінің түбін түсіре биледі. Әйгілі өнеріміз – «Қыз бен жігіт айтысын» да мұғалімдер шеберлікпен көрсете білді. Ұлттық ойындар – асық ату мен қол тартысы да мереке көркін аша түсті.