2013 жылдың 27 қарашасы күні №81 жалпы білім беретін орта мектепте  «12 жылдық білім беру жағдайында қазақ тілі мен әдебиеті сабақтарында оқушыларда қалыптасатын құзыреттіліктер» тақырыбы бойынша  орыс тілді мектептердегі қазақ тілі мен әдебиеті мұғалімдеріне арналған қалалық семинар өткізілді.

       Семинарға қалалық білім бөлімінің әдіскері М.К. Жакишева қатысты. Семинар жұмысы №81 ЖББОМ  ҚР Тіл туралы Заңын орындау мақсатында атқарылған  мектептің жұмыстарымен таныстырудан басталды.  Яғни баяндамада орыс сыныптарына қазақ тілін оқыту жағдайы, мемлекеттік тілді өзге ұлт өкілдеріне  үйрету мәселесі, мектеп мұғалімдері әзірлеген әдістемелік құралдар туралы айтылды. Одан кейін №73 ЖББОМ қазақ тілі мұғалімі Ә.Б. Айшолпанова «12 жылдық білім беру жағдайында қазақ тілі мен әдебиеті сабақтарында оқушыларда қалыптасатын құзыреттіліктер» тақырыбы бойынша баяндамасын жасап, өз іс-тәжірибесімен бөлісті. Ол 12 жылдық білім беруге көшудегі басты бағыттарды анықтай отырып, сол бағыттар арқылы оқушылардың бойынша қалыптасатын құзыреттіліктерді атап көрсетті.

       Семинар бағдарламасы бойынша мектепте қазақ тілі мен әдебиеті мұғалімдері ашық сабақтарын көрсетті. А.С. Үйсембекова қазақ тілінен   5-ші сыныпта «Алматы қаласы»  тақырыбы бойынша, Г.М. Абылкасова 7-ші сыныпта «Спорт киімі» тақырыбы бойынша, Р.С.Жмогулова қазақ әдебиетінен 8-ші сыныпта «Ш.Құдайбердіұлы «Адамдық борышың....» тақырыбы бойынша, Ж.С.Қабдиева 6-шы сыныпта «Cенің туған күнің қашан?»   тақырыбы бойынша ашық сабақтарын жақсы дәрежеде өткізе білді.

        Бұл ашық сабақтарға қатысқан мұғалімдер сабақ соңында талдау жүргізді. Әр мұғалімнің жетістіктері мен кеткен кемшілік тұстары айтылды. Әдіскер М.К.Жакишева да мұғалімдердің сөзін толықтырып, өзінің ұсыныстарын білдірді.

        Семинар соңында мектеп ұжымының өнерлі оқушылары шағын концерттік бағдарлама аясында өз өнерлерін көрсетті, жалпы рефлексия өткізілді.