Домбыра - әрбір қазақ өмірінің және жан дүниесінің бір бөлігі.Біздің шексіз даламызды әсем әуенсіз, домбырасыз елестету мүмкін емес. Қазақтың музыкалық мәдениеті халықтың рухани дамуына үлкен рөл атқарады.Қазақ тарихында сан ғасырлар бойы ұрпақтан-ұрпаққа жалғасып келе жатқан ұлағатты мұра.Бұл домбыра.

Бұл музыкалық аспаптың тарихы өте қызықты және ерекше, өйткені қазақ домбырасының жасалуы туралы көптеген нанымдар бар.

Домбыра күні қарсаңында «Ақниет» балабақшасында «Домбыра туралы не білеміз», «Нағыз қазақ - домбыра», «Домбыраның әдемі үні» атты тақырыптық сабақтар өткізілді.

Ұйымдастырылған оқу қызметінде балалар домбыраның қандай элементтерден тұратынын, оның қалай дыбысталатынын, күй деген не екенін білді, Құрманғазының «Балбырауын» және «Сары Арқа», Дина Нұрпейісованың «Кішкентай», «Бұлбұл» күйлерін рахаттана тыңдады.Дидактикалық ойынды ойнау барысында балалар домбыра туралы жұмбақтарды тауып, аспаптардың дыбысын атады. Балалар домбыра туралы тақпақтар оқыды. Сондай-ақ «Ақсақ құлан», «Домбыра туралы аңыз», «Әли мен Ая» атты мультфильмдер көрсетілді.Ересектер тобының балалары «Домбыра» атты қимылды ойындары мен «Домбыраны кім жинайды» атты дидактикалық ойындарды ойнады, бұл іс-шаралардың барлығы балалардың ұлттық музыкалық аспапқа деген қызығушылықтарын және домбырада ойнауды үйренуге деген ынталарын оятуға бағытталған.

Өскелең ұрпақты халқымыздың тарихы мен салт-дәстүрге сүйіспеншілікпен қарауға тәрбиелеуіміз керек және біз өз тәрбиеленушілеріміз үшін ұйымдастырған домбыра күні сияқты мерекенің болғанына өте қуаныштымыз, мүмкін біздің тәрбиеленушілеріміздің арасында болашақ ұлы музыканттар бар шығар.