25 мамыр күні біздің мектепте соңғы қоңырау салтанаты өтті.

          Биыл 9-сынып бітіргелі отырған түлектер үшін бұл мектептегі соңғы қоңыраулары болса, ал 1-сынып бітірген бүлдіршіндер алғаш рет соңғы қоңырау сыңғырына куә болды. Мамыр айында болатын мектептердегі соңғы қоңырау салтанаты әр адамның өмір естелігінде жазылып қалатын ең жақсы күндерінің бірі емес пе? Достар күлкісі, ұзаққа созылатын 45 минут пен лезде зулап өтетін үзілістер, қатаң мұғалімдер - осылардың барлығы соңғы қоңыраудан кейін түлек үшін басқаша қабылданады. Бұл күн жай күн емес – ол өмірдің белгілі бір кезеңімен қоштасу және болашаққа бастар жаңа қадам. Сөйтіп, балғын балалық шаққа «қош» дегізіп, соңғы қоңырау сыңғыр қақты. Күні кеше ғана қара көзі мөлдіреген балақан мен тұлымшағы желбіреген қыз енді мектеп партасымен мәңгілік қоштасып, үлкен өмірге қанат қағар алдында тұр. Соңғы қоңырау - тек алтын ұямен қоштасу сәті ғана емес, сонымен қатар бір жылғы білім сапасын таразылау, жеткен жетістіктерге сүйсініп, келешекке кемел жоспарлар құру кезеңі.