Ұлт сақталуының негізі - тіл Еліміздің негізгі рәміздерінің бірі – мемлекеттік тіл. Сонымен қатар, ата заңымызда да «Қазақстан Республикасының мемлекеттік тілі – қазақ тілі» деп жазылған. Сондықтан мемлекеттік тіл мәртебесін көтеру, жас жеткіншектер мен бүлдіршіндердің бойында тілді дамыту қасиетін ұялату ұстаз қауымның басты міндеттерінің бірі болып саналады. Осындай міндетті арқалап жүрген Қарағанды қаласындағы №40 негізгі мектебінің бастауыш сынып мұғалімі Муратова Айсұлу Ақыловна бүлдіршіндердің ұлттық болмысын танып-білуіне аса назар аударып келеді. Мектеп табалдырығын жаңа аттаған балалардың болашаққа көзқарасы мен өзіне деген сенімдерін нығайту мақсатында, Қарағанды өлкесінің тумасы, айтыскер ақын, жыршы-термеші, халықаралық ақындар айтысының жеңімпазы Қамиев Дидар Жанатұлымен онлайн кездесу ұйымдастырды. Кездесу барысында Дидар Жанатұлы өз шығармашылығымен бөлісті, балалардың жас ерекшеліктеріне сай жазылған «Ата-ана қадірі, «Ана туралы» өлең-жырларынан үзінділер оқып, шаттыққа бөледі. Сонымен қатар, «білім қалқан инемен терең құдық қазғандай» екеніндігін 1-сынып оқушыларының санасына енгізуге септігін тигізді. Жас та болса, алған белесі мен жеткен жеңісі мол айтыстың ақтаңгері атанған Дидар Жанатұлына оқушылармен қоса, ата-аналар да дән риза болды. Елбасымыз айтқандай, «Қазақстанның болашағы – қазақ тілінде». Ендеше, тілімізді, ұлтымызды отбасымызды қадірлегендей қадірлейік, сыйлайық. Туған тілімізде жазылған шығарма мен өлең-жырларды оқуға, жас ақындармен таныстырып, білімге, қазақ тілінде сөйлеуге құштарлығын арттыруға ат салысайық! № 40 негізгі мектебінің қазақ тілі мен әдебиеті пәні мұғалімі Ташпулатова Акмарал Унарбаевна