Еліміздің әлемдегі бәсекеге барынша қабілетті елу елдің қатарына кіру стратегиясында Елбасы Н.Ә.Назарбаев: «Білім беру реформасы – Қазақстанның бәсекеге нақтылы қабілеттілігін қамтамасыз етуге мүмкіндік беретін аса маңызды құралдардың бірі», - деп ерекше бөліп көрсетті. Осыған орай әлемдік жаһандану жағдайларына байланысты мектеп ұжымының алдында жасөспірімдердің салауатты өмір салтын бейімдеу талабы тұр.

Қыс мезгілі басталғалы мектебіміздің бірқатар оқушылары: Марипова Алсу, Воронкова Александра, Мансурова Диана, Зубкова Александра, Витязь Александр, Астафьева Ангелина қысқы Президенттік көпсайыс бойынша қала, облыс, Республика деңгейінде өткізіліп жүрген жарыстарға қатысып, жүлдемен оралып жүр.  «Еңбегі көптің өнбегі көп» - демекші осындай дәрежеге жетуіміз бапкерлердің тынымсыз еңбегінің арқасында. Осыдан 3 жыл бұрын, облыстық жасөспірімдер спорт мектебінің бапкері Лукьянов Алексей Лукичтың бастауымен мектепте Қысқы Президенттік көпсайыс спорттық секциясы ашылды. Бұл секцияның мақсаты – жасөспірімдердің қысқы спорт түрлеріне деген сүйіспеншіліктерін арттырып, салауатты өмір салтына баулу. Жылдан жылға бұл спорттық секцияға қатысушы балалардың саны көбеюде. Қазіргі таңда бұл спорт түрімен айналысатын балалардың саны 80-ге жуық.  Ата-аналардың жұмыс нәтижесіне ризашылықтары шексіз.

Биылғы оқу жылында мектебімізде жас маман, Қазақстан республикасының бірнеше дүркін чемпионы Калибеков Алданыш Нұрланович шаңғы спортын дәріптеуде. Мектеп директоры Ықлас Мустафиннің қолдауымен, аз уақытта екі бапкердің үйлесімді еңбектерінің арқасында, № 8 ЖББОМ Президенттік көпсайыс құрама командасы мектебімізді Майқұдықтағы ең мықты мектептің бірі екенін дәлелдеді.