Жаңадан бүр жарып, өсіп келе жатқан жас шыбықтай ғана бастауыш сынып оқушыларымыздың әр қайсысының бойында тұнып тұрған өнер бары анық. «Нағыз бақытты адам – өз жолын тапқан адам» -деген даналық сөз бар емес пе? Оқушы болашағына дұрыс бағыт-бағдар беру- отбасы мен  мектептегі ұстаздардың басты міндеті.

«Бұлақ көрсең, көзін аш» -дегендей, мектебімізде баланың қиялына қанат бітіріп, өзгелерге үлгі-өнеге болатындай, мектеп әкімшілігінің ұйымдастыруымен  2014 жылдың 25 қазаны күні 4 «Ә» сынып оқушысы Рахимов Жауынның өнер туындыларына арналған жеке көрмесі болып өтті. Көрмеге түрлі жанрда орындалған 30-дан астам еңбек қойылды. Жансыз дүниеге жан бітіріп, мылқау бейнені «сөйлетіп» қою тек талантты өнер иесінің ғана қолынан келмек. Көздің жауын ғана емес, жүректі де жаулап алған жас суретшінің жұмыстары көрермендерді таң-тамаша қалдырды. Небары 10 жастағы жас таланттың суреттеріне үңіле отырып, оның өнерге деген сүйіспеншілігін, өмірге деген құштарлығын, эстетикалық талғамын, психологиялық мінез-құлқын аңғару қиын емес еді. Жауынның ерекше қабілеті тек сурет өнерімен ғана шектелмейді, оқуда озат, қай пәннен болмасын алғыр, әр іске тиянақты.

 Бұл көрмеге Жауынның қатысып жүрген сурет үйірмесінің жетекшілері келіп, өз лебіздерін білдірді. Соның бірі- жасөспірімдер сарайы «Ала гүлдер» студиясының жетекшісі Исагинова Марина Михайловна және  Қарағанды қаласының әкімшілігіне қарасты облыстық көркемөнер мектебінің «Экспромт» студиясының жетекшісі Дроздова Лидия Дмитриевна бала бойындағы ерекше қабілетінің шыңдалуына өзіндік үлесін қосқан ұстаздары ретінде Жауынға ақ жол, жарқын болашақ, шығармашылық шабыт тіледі.

Біз де жас таланттың болашақта қазақтың әйгілі суретшісі Әбілхан Қастеев атамыз сияқты ірі тұлғалардың біріне айналуына тілектеспіз!