Нұр себеле, Ұлыстың ұлы күні!
Армысыңдар, халайық,
Бармысыңдар, халайық.
Наурыз тойын жұп жазбай
Жылда қарсы алайық! – деп ұрандата отыра, № 82 ЖББОМ 2014 жылдың 19 наурыз күні шығыс халқының ортақ мейрамы – Наурыз мерекесін жоғарғы дәрежеде атап өтті. Бүкіл түркі халқының ұлық тойы – Наурыз мерекесін ұлттық салт-дәстүрімізбен, әдет-ғұрпымызбен байланыстыра насихаттап, ұрпақтардың өз ұлтына деген сүйіспеншілігін арттыру мақсатында ауыл-ауылға бөлінген әр сыныпта үлкен мерекелік іс-шаралар өткізілді. Осындай тағылымы мол іс-шараға бастауыш буын ата-аналары мен оқушылары және ұстаздары ат салыса қатысты. Сынып бөлмелері ауылдың атына сай ұлттық нақышта безендіріліп, оқушылардың қолымен жасалған қолөнер бұйымдарынан көрме ұйымдастырылды және қазақтың ұлттық тағамдарынан дастархан жайылды. Бұл бағдарламада ұмыт болып бара жатқан қазақтың салт - дәстүрінен көріністер көрсетіліп, ұлттық ойындар ойнатылып, ән-жырдан шашу шашылды. Оқушыларымыз арқан тартыс, күш сынасу, асық ату, аударыспақ, хан талапай тәрізді ұлттық ойындарға қызыға қатысса, ата-аналар да өз өнерлерін ортаға салып, «Ұшқыр ой», «Бір сұраққа он жауап» сайыстарында бақ сынасты. Бағдарлама соңы ақ жаулықты әжелеріміздің тілек- батасымен аяқталды.
Наурыз мерекесі барша жұртқа құт-береке әкелсін!
Контакты
