Қош келдің, Наурыз!

Қазақ әдебиетінің көгінде жарқырай жанған жарық жұлдыздарының бірі Мағжан Жұмабаев: «жалпы мұсылман жұрттарына ортақ жылына екі рет келетін ораза, құрбан айттарын есепке алмағанда, бізде жалғыз-ақ мейрам бар, ол – Наурыз», –деген екен.

Әр жылы наурыз мерекесі  №82 жалпы білім беру орта мектебінде өз деңгейінде атап өтілуі  жаңа дәстүрге  айналғандай. 17 наурыз күні бастауыш сынып ұжымының арасында ата-ана, оқушы, ұстаз, жұртшылық өкілдерін ынтымақтастандыру, оқушыларды қазақ халқының салт-дәстүрін, тілін, дінін, әдет-ғұрпын сақтауға, қастерлеуге баулу мақсатында«Қош келдің, Наурыз!»  атты мерекелік шара ұйымдастырылды. Биылғы мереке де есте қаларлықтай болды.  Мерекеге ұлттық киім киген оқушылар мен қоса ұлттық нақышта киінген ақ жаулықты әжелеріміз және барлық ата-аналар белсене қатысты. Наурыздың ең басты көркі -мол дастарханы. Әр сынып ұжымы дастархан жайып, қазақтың ұлттық тағамдарын көпшілікке тарту етті.

Мектеп директоры Әлмағамбетова Ұлжан Ағымбайқызының ақ тілегімен бастау алған бұл мерекелік шара бастауыш сынып ұстаздарының ұйымдастыруымен шағын қойылымдар және концерттік бағдарламалармен ұласып жатты. 1,2,3-сынып қыздарының  мың бұралған билері көрермендердің көзайымына айналса, 3 «ә» сынып оқушысы Құсаинова Алуаның, 4 «ә» сынып оқушысы Рамазанова Айдананың тамылжыта салған әндері дүйім жұртты тамсандырып жатты. Көрермен қауым да назардан тыс қалмады. Тазша бала мен Алдар көсенің тапсырмасын орындап, «Бүркіт» пен «Арқан тарту» сияқты қазақтың ұлттық ойындары ойнатылып, ұлттық салт-дәстүрлерден көріністер көрсетілді.

 Өте тартымды өткен мерекелік шараның соңы 6 бала тәрбиелеп өсірген, ақ жаулықты Әлкеева Төлеубике әжеміздің ақ батасымен аяқталды.  

Қарағанды қаласы

Октябрь ауданы

№ 82 жалпы білім беру орта мектебінің

1-сынып мұғалімі:   Абугалиева С.Н.