Кітапханада 2018 жылдың 26 маусымында ақын Мағжан Жұмабаевтың туғанына 125 жыл толуына орай «Алаштың ақ жүректі ақыны» тақырыбында поэтикалық этюд өткізілді. Іс-шараға қатысушылар кітапхананың тұрақты оқырмандары болды.

Мақсаты:Оқырман бойында үлкенді сыйлау қабілетін қалыптастыру, ақын Мағжан Жұмабаевтың  өлеңдерімен таныстыру негізінде патриоттық, Отанына сүйіспеншілік, өнегелілік, рухани тәрбие беру.

Көрнекілігі:Кітап көрмесі «Алаштың ақ жүректі ақыны».

Іс-шара жүргізушісі Қайырбекова Д. қатысушыларды ақынның өмірі мен шығармашылығымен таныстырды.  Мағжан –халқының болашағына сенген, келешектен зор үміт күткен. Кейінгі ұрпақ шуақты күн шапағатына бөленетініне сенім білдірген. Мағжан – ұлтжанды ақын. Ол бүкіл ақындық талантын ұлтына, Алашына бағыштаған. Ол әрдайым халқының адал перзенті болған. Алаш жұртын бөлмей, оған өз жүрек жылуын, жан лүпілін білдіре жырлайды. Өлең жолдарындағы әсем сөз маржандары оқушыны сұлулық әлеміне ендіріп, сүйіспеншілік сезімге бөлейді.

Мағжан Жұмабаевтың ақындық құдіретін биік бағалап, оның үлкен болашағына сеніммен, құрметпен қарап, қасиеттей білген Ахмет Байтұрсынов, Жүсіпбек Аймауытов,  Міржақып Дулатов, Сәкен Сейфуллин, Бейімбет Майлиндер болды. 1928 жылдың өзінде-ақ Мұхтар Әуезов қазақ поэзиясына деген ұғымын байытқан Мағжан Жұмабаевқа ғажайып өлеңдері үшін ризашылық білдірді.

Іс-шара өткізу барысында қатысушыларға ақынның өмірі мен шығармашылығы жайында документальді кино-журнал көрсетілді.

Сонымен бірге ақынның шығармашылығына арналған кітап көрмесіне шолу жасалды. Кітапханашылардың міндеті пайдаланушылар арасында ақын Мағжан Жұмабаевтың шығармашылық мұрасының  маңыздылығын көрсете білу, әр пайдаланушының жүрегіне ақынның лирикалық ой-тебіренісін жеткізу, қазақ халқының әдебиеті мен мәдениетін білуге, түсінуге, бағалауға ықыластары артуына тәрбиелеу. Орыс халқына орыс ақыны Сергей Есенин қалай қымбат болса, Мағжан Жұмабаев өзінің ұлттық ерекшелігімен әрбір қазақ оқырманына қымбат.