Халық өзінің егемен құқығын пайдаланып, қабылдаған Конституция қол сұғылмас қасиетке, жоғары заңдық қана емес, рухани-адамгершілік киелі күші бар - тәуелсіз мемлекетіміздің үлкен қазынасы.
20 жыл бұрын 1995 жылы 30 тамызда бүкілхалықтық референдумда қабылданған Конституциямыз Қазақстан азаматтарының күнделікті өміріне қажетті сұрақтардан бастап, стратегиялық сипаттағы мәселелерді шеше алды. Ең алдымен, адам және адамның өмірі, құқықтары мен бостандықтары Қазақстан мемлекетінің ең қымбат қазынасы деп табылды. Адам құқықтары мен бостандықтары тек декларация ретінде емес, мемлекет қаншалықты жүзеге асыра алатындығына байланысты негізделе отырып, Конституциядан өз орнын алды.
Ата заңымыз жаңадан құрылған мемлекеттігімізді, мемлекеттік билік пен мемлекеттік басқару жүйесін жан-жақты нығайтты. Ел экономикасын түбегейлі реформалау мен оны терең дағдарыстан шығарудың проблемаларын шешті. Еліміздің сындарлы сыртқы саясат жүргізуіне ықпал жасады. Ішкі саяси тұрақтылықты қамтамасыз етті. Өркениетті әлемде азаматтардың жалпыға танылған құқықтары мен бостандықтарын орнықтырып, демократиялық институттарды дамытты.
1995 жылғы Конституциямыз экономикалық реформаларға тың серпін беріп, мемлекет қызметі үшін нарықтық қатынас талаптарына сай келген және сай келетін заңнамалық негіздің және заңнамалық өрістің жасалуын қамтамасыз етті.
Қолданыстағы Конституцияның аясында мемлекеттік меншік пен жеке меншіктің аражігі ажыратылып, бірдей танылып қорғалады деп атап көрсетілді. Меншік субъектілері мен объектілері, меншік иелерінің өз құқықтарын жүзеге асыру көлемі мен шектері, оларды қорғау кепілдіктері заңмен белгіленеді деп атап көрсетілді. Қазақстан Республикасының азаматтары заңды түрде алған қандай да болсын мүлкін жеке меншігінде ұстай алады, әрі меншікке, оның ішінде мұрагерлік құқығына заңмен кепілдік беріледі деп көзделді. Соттың шешімінсіз ешкімді де өз мүлкінен айыруға болмайтындығы баса айтылды. Әркімнің кәсіпкерлік қызмет еркіндігіне, өз мүлкін кез келген заңды кәсіпкерлік қызмет үшін еркін пайдалануға құқығы бар екендігі ескерілді.
Конституцияның осы айтылған ережелеріне сәйкес республикамызда экономикалық, меншіктік құқықтарға нұқсан келген жағдайда, оларды қалпына келтіру сипатты құқықтық саясат жүргізіліп келеді. Әрине бұл саясат Ата Заңымыздың мемлекетіміздің әлеуметтік мемлекет ретінде орнығатыны туралы нормалармен тікелей байланысты.
