8 шілде күні таң атпастан мектеп ішінен балалардың дауысы естіле бастады. №82 ЖББОМ жанынан ашылған «Балауса» жазғы сауықтыру лагері 3 маусымдағы өз жұмысын бастады. Балалар таза ауада таңғы жаттығуларын жасап, лездемеде рапорт беруге даярланды. Алғашқы күннен бастап, топтың атын, белгісін, ұранын ойластыруға тура келді. Бірінші күннің лездемесінде балалар лагерь заңымен, күн тәртібімен таныстырылды. Одан кейін әр топта лагердегі қауіпсіздік ережелері туралы танысты. Сағат 11.00-де мәдениет үйінде «Радуга детства»тақырыбында ойын-сауық бағдарламасы ұйымдастырылды. Мектепке келген соң асфальтта «Шылым шегуге қарсымыз» тақырыбында байқау өткізілді. Ең жақсы жұмыс сыйлықтармен бағаланды.

Лагерьдің ашылуына дайындық

     9 шілде күні «Балауса» жазғы сауықтыру лагерінің 3 ауысымының ашылуына дайындық басталып кетті. Әр топ топтың ұрандарын, әндерін жаттап дайындалды. Дайындықтан соң қаламыздағы Абай атындағы кітапханаға барып, әдеби кітаптармен танысып, кітапханашы апайдың сұрақтарына қызыға жауап берді. Лагерь соңындағы лездемеде топтар «Ең таза топ», «Ең білгір топ» деген атақтармен марапатталды.

     10 шілдеде  «Балауса» жазғы лагерінің 3 күніәдеттегіндей таңғы жаттығу жасаудан басталды. Таңғы астан кейін лагерь тәрбиешілерінің басшылығымен «Жол белгілерінің білгірлері» тақырыбында «Жауқазын» және «Одуванчик» топтары арасында байқау ұйымдастырылды. Өте тартымды өткен байқауда екі топ та тең түсті. Байқаудан кейін лагерь балалары бассейнге барып, шомылып, үйлеріне тарасты.

Білімді мыңды жығар

     Бүгін балалар тек қазақ тілін үйреніп қана қоймай, қауіпсіздік ережелері туралы да көп ақпараттармен танысты. Қазақ тілі мұғалімі Бекимова А.Т. өз сабағын қауіпсіздік ережелерімен байланыстырды. Лагерь тәрбиешілері Дайырбекова А.К. және Миллер Н.Ф. «Қызықты оқиғалар» деп аталатын лагерь балаларымен байқау ұйымдастырды. Балалар байқауда мектептен алған білімдерін өмірмен ұштастыра отыра қызыға қатысты. Түрлі жағдаяттарды шешу арқылы бір топ өздерінің тапқырлықтарын танытса, енді біреуі білімдерін ортаға салды. Жеңген топ сыйлықтарға ие болды.

Лагерьдің ашылу күні

     Бүгінгі күн лагерьдің ашылу салтанатынан басталды. Таңғы астарын ішкен соң балалар Майқұдықтағы мәдениет үйіне аттанды. Онда әр топ өз өнерлерін ортаға салды. Лагерьдің ашылу салтанатына жақсы дайындықпен келген балалар билерімен, әндерімен және қысқаша көріністерімен біздерді таң қалдырды. Шағын мерекелік бағдарламадан кейін би кеші ұйымдастырылды. Би кешінде ойнатылған ойынға белсене қатысып, өнерін ортаға салған топ мүшелері арнайы сыйлықтармен марапатталды. 

     15 шілде 2013 жыл  Бүгінгі күн көңілді, бойды сергітетін жаттығумен басталды. Таңғы астан кейін спорт алаңында топтар арасында «Толағай» сайысы өтті. Жеңіске «Одуванчик» тобы ие болып, тәтті сыйлықтармен марапатталды. Сайыстан соң тәрбиешілер балаларды өрт сөндіру бөліміне апарды. Балалар өрт кезіндегі қауіпсіздік ережелермен танысып қана қоймай, ондағы қызметкерлердің жұмысы оңай еместігіне көздері жетті. Мектепке қайта оралған балалар түскі астарын ішіп, таза ауада ойындар ойнады.

     16 шілде 2013 жыл. Бүгінгі күн біртүрлі. Таңертеңнен біресе күннің көзі шығады, біресе жаңбыр жауады. Бірақта бұл біздің көңіл-күйімізге әсер ете алмады. Себебі біз «Ботагөз» кинотеатрына аттандық. Балалар қызықты фильмді тамашалағаннан кейін бізді «Түсті қарындаштар» мерекесі күтіп тұрды. Балалардың дүниетанымын айқындауға арналған бұл шара өте қызықты өтті. Әр бала өз өнерін ортаға салды. Нәтижесінде ең жақсы 5 жұмыс анықталды. Олар:

1.Качкина Экатерина – 1-орын.

2.Дүйсегелді Жанел – 2-орын.

3.Рейник Матиас – 2-орын.

4.Тулебеков Нұрбол, Когутенко Виктория – 3 –орын. Түскі астан кейін балалар таза ауада ойнап үйлеріне тарасты. Күн өте көңілді өтті.

     17 шілде 2013 жыл. «Балауса» жазғы лагеріндегі балалар күнделікті жаттығудан кейін, таңертеңгі астан соң бөлмелеріне барып сайысқа дайындалды. Қазақ тілі үйірмесінің жетекшісі Бекимова А.Т. ұйымдастыруымен топтар арасында «Алтын қақпа» танымдық ойыны өткізілді. Қазақ тілі, дүниетану пәндері бойынша қойылған сұрақтарға балалар қызыға жауап берді. Ойын өте тартымды  әрі қызықты өтті. «Одуванчик» тобы жеңіске жетіп, тәтті сыйлықтарға ие болды. Ойыннан соң барлық бала бойға қуат, көтеріңкі көңіл-күй алу мақсатында бассейнге аттанды. Бассейннен соң түскі астарын ішіп, таза ауада ойнады.

     18 шілде 2013 жыл. Күнделікті дәстүрлі күн тәртібінен кейін балаларды «Джунгли шақырады» ойыны күтіп тұрды. Балалар сұрақтарға белсене жауап бере отырып,  ойынға қызыға қатысты. Барлық тапсырмаларды мұқият орындады. Ойын аяқталысымен жолда жүру ережесі туралы сурет байқауына қатысты. Балалар не салмады десеңші! Олардың қиялында шек болмады. Соңында жеңімпаздар тәтті сыйлықтармен марапатталды. Біріңғай байқаулардан кейін лагерь балалары экологиялық мұражайға серуенге аттанды. Қаламыздағы экологиялық мұражайдан балалар көп мағлұматтар мен пайдалы кеңестер алды. Мектепке қайта оралған балалар түскі астарын ішіп, үйлеріне тарасты.

     19 шілде 2013 жыл.  «Балауса» лагеріндегі балалар үшін бүгінгі күн «Табиғат күні» деп аталды. Таңғы астан кейін тәрбиешілер мен балалар қажетті заттарды алып табиғатқа серуенге шықты. Табиғатта барлық балалар алып келген тамақтарын жеп, түрлі ойындар ойнап, ән айтып, би билеп қайтты. Бұнымен серуеніміз аяқталған жоқ. Топтар арасында спорттық жарыстар ұйымдастырылды.  Спорттық жарыста баланың тек спортқа икемділіктерін ғана көрсетіп қоймай, басқа іс-әрекеттегі жетістіктерін көрсете білді. «Ең  мықты...» мадақтамасына ие болу үшін  топтағы әр бала өзінің ептілігін көрсетуге тырысты. Ойынның жеңімпаздары тәтті сыйлықтармен және мадақтамамен марапатталды.Осылайша көтеріңкі көңіл-күймен балалар үйлеріне қарай бет алды.