Үстіміздегі жылдың қаңтар айындағы қалалық білім бөлімінің жоспары бойынша орыс тілді мектептердегі қазақ тілі  мен әдебиеті пәнінің кезекті отырысы мұғалімдерге арналған семинар практикум болып ұйымдастырылды. Бұл шара 14 қаңтар 2015 жылы  қаламыздың №51 негізгі орта мектебінің қабырғасында  «Заман талабына сай қазақ тілі мен әдебиеті  сабақтары қандай болу керек?» деген тақырыпта өтті. Мақсаты: мұғалімдердің заман талабына сай сабақтарды ұйымдастырып, өткізуі арқылы нәтижеге жету жолдарының тиімділігі. Осы орайда №78  негізгі орта мектебінің қазақ тілі мен әдебиеті пәнінің  мұғалімі Бақыт Кенжебековна Билялова «Заман талабына сай білім беру бағыттарының тиімділігі» атты коучинг сессия өткізді. Бұл сессияның мақсаты: сабақта нәтижеге қол жеткізу үшін белгіленген  7 модульдің тиімділігін білу, сабақта қолдануға бейімделу. Топқа бөлініп жұмыс жасаған әріптестер әр кезеңдегі тапсырмаларды орындай отырып, өз іс тәжірибелерімен бөлісе алды.  Коучинг  тапсырмалары сыни тұрғыдан ойлау стратегияларына негізделіп жасалғандықтан, соңындағы кері байланыс «Екі жұлдыз, бір тілек» әдісі арқылы жасалды. Қалалық білім бөлімінің әдіскері Гүлзат Кенжебаевна Аймағанбетова өз кезегінде рефлексия туралы жасаған баяндамасының бір кезеңін көріп, семинар практикумның бір-біріне үйлесімдікпен өткендігін атады.